1 हुंह शमौन पतरास ज़ुंण मसीहो दास अर शधाणूं आसा,

हुंह लिखा ऐहा च़िठी तम्हां सोभी लै ज़ुंण तेऊ किम्मती विश्वासा दी साझ़ डाहा ज़ुंण विश्वास हाम्हां लै ईशू मसीहा आसा दैनअ द, ज़ुंण म्हारअ परमेशर अर उद्धार करनै आल़अ आसा अर ज़ुंण हाम्हां परमेशरा संघै धर्मीं बणाआं।

2 हुंह करा परमेशरा का एही प्राथणां कि सह तम्हां लै होर बी खास्सअ जश अर शांती दैए, किल्हैकि तम्हां का आसा परमेशरो अर मसीहा ईशूओ ज्ञैन ज़ुंण म्हारअ प्रभू आसा।

3 परमेशरै दैनी हाम्हां लै आपणीं शगती करै तिंयां सोभै गल्‍ला ज़ेते हाम्हां धर्मीं ज़िन्दगी ज़िऊंणां लै ज़रुरत ती। इहअ सका हई किल्हैकि हाम्हां का आसा परमेशरो थोघ अर अह आसा सह ई ज़ुंणी हाम्हैं आपणैं प्रतप्पा अर भलाई दी साझ़ू हणां लै आसा शादै दै। 4 एऊ ई प्रतप्पा अर भलाई करै दैनी परमेशरै हाम्हां लै बडी महान अर किम्मती च़िज़ा। ईंयां आसा तिंयां करारा ज़ेता करै तम्हैं संसारे मणछे बूरी च़ाहा का दूर रहा ज़ुंण तिंयां लोग च़ाहा करनअ अर तम्हैं हआ परमेशरे भलै सभाबा दी साझ़ू।

5 किल्हैकि तम्हैं आसा परमेशरे भलै सभाबा दी साझ़ू, तै निं तम्हैं सिधै मसीहा दी विश्वास करनै आल़ै रही, तम्हां लागा हर बगत होरी लै भलै करदै रहणअ लागी। तेखअ निं तम्हैं सिधै भलै करनै आल़ै लोल़ी रहै, तम्हां लोल़ी होरी लै बभारा करने समझ़ बी हुई। 6 सिधअ इहअ निं समझ़णअ कि किहअ बभार करनअ, तम्हां लागा आप्पू बी काबू दी रहणअ ताकि तम्हैं तेही बूरी गल्‍ला नां करे ज़ेता तम्हैं करनअ च़ाहा। तम्हैं निं सिधै आप्पू काबू करनै आल़ै रही, तम्हां लागा दुखा दी सबर बी करनअ। तम्हैं सिधै सबर डाहणैं आल़ै बी निं लोल़ी रहै, तम्हां लागा तेही ज़िन्दगी बी ज़िऊंणीं ज़ेता करै परमेशर खुश हआ। 7 तम्हैं निं सिधै एऊ साबै ज़िऊई ज़ेता करै परमेशर खुश हआ, तम्हां लागा एकी-दुजै संघै आपणैं टबरा ज़ेही झ़ूरी बी करनी।

8 ज़ै तम्हां दी ईंयां सोभै गल्‍ला होए अर बझ़दी लागी रहे, इना करनी थारी मैन्थी मणछ अर तम्हां म्हारै प्रभू ईशूए ज्ञैना दी फल़णां-फूलणां लै मज़त। 9 पर ज़ै कहा मणछा दी ईंयां सोभै गल्‍ला नांईं होए, सह आसा इहअ मणछ ज़हा का राम्बल़ै करै शुझदअ निं आथी अर सह आसा कांणअ। सह गअ बिस्सरुई कि परमेशरै हेरै तेऊए पाप माफ करी ज़ुंण तेऊ मसीहा ईशू दी विश्वास करनै का आजी किऐ तै।

10 तैही बोला हुंह, भाईओ, एता का बी करा बधिया बभार डाहणें कोशिश ताकि तम्हां का अर होरी लोगा का बी शुझिए कि परमेशरै आसा तम्हैं आपणैं खास लोग हणां लै शादै दै। ज़ै तम्हैं इहअ करे, तम्हैं निं विश्वासा का कधि दूर हई सकदै, 11 अर परमेशरा बी करनअ थारअ तेऊ राज़ा दी बडअ सुआगत ज़िधी ईशू मसीहा सदा-सदा लै राज़अ हणअ, ज़ुंण म्हारअ प्रभू अर उद्धार करनै आल़अ आसा।

12 एही ता आसा तम्हां का इना गल्‍लो थोघ अर ज़ुंण तम्हां का मसीहे बारै शुची शिक्षा खोज़ी दी आसा, तिंयां तम्हैं पाक्‍की बी आसा ढाकी डाही दी, पर तज़ी बी रहणअ मुंह एते बारै तम्हां का आद फरेऊंदै लागी। 13 हुंह समझ़ा ऐहा गल्‍ला आप्पू लै भली कि ज़ेभै तैणीं हुंह ज़िऊंदअ आसा, तेभै तैणीं रहणअ मुंह तम्हां का इना गल्‍ला आद फरेऊंदै लागी ताकि तम्हैं इना गल्‍ला बिस्सरी निं पाए। 14 किल्हैकि मुखा आसा थोघ कि मेरी मौत हणीं ऐबै छ़ेक्‍कै किल्हैकि प्रभू ईशू हेरी अह गल्‍ल मुखा प्रगट करी। 15 तै आसा मेरी एही कोशिश कि हुंह इना गल्‍ला तम्हां लै लिखूं, ताकि तम्हैं मेरै मरनै का बाद बी सदा आद करी सके।

16 किल्हैकि ज़धू हाम्हैं शधाणूं प्रभू ईशू मसीहे फिरी एछणें शगतीए बारै समाद खोज़अ, हाम्हैं निं तम्हां का आपणीं बाखा बणाईं दी कथ्या च़ोपल़ लाई खोज़ी आथी। पर हाम्हैं भाल़अ आपणीं आछी मसीहो प्रतप्प। 17,18 हाम्हैं तै मसीहा संघै पबित्र धारा, ज़िधी तेऊ लै बाब परमेशरै अदर दैनअ अर परमेशरो महान प्रतप्प त तेऊ फेर लागअ द। तैहा ई घल़ी शूणअ हाम्हैं स्वर्गा का इहै बोल, प्रतप्पी परमेशर थिअ तेऊ लै इहअ बोल्दअ लागअ द, "अह आसा मेरअ पूत ज़हा लै हुंह खास्सअ झ़ूरा अर हुंह आसा एऊ करै खुश।"✝

19 हाम्हां का आसा इहअ बी थोघ कि ज़ुंण गल्‍ला परमेशरे कई गूरै मसीहे बारै आसा लिखी दी, तिंयां आसा शुची, अर तिंयां करा ऐहा गल्‍ला बी पाक्‍की ज़ुंण हाम्हैं तम्हां का तेऊए फिरी एछणें बारै खोज़अ। तम्हैं शूणैं तिन्‍नां बैणा राम्बल़ै करै। किल्हैकि ज़िहअ लोगा न्हैरै दी हांढणा लै दीअ ज़ाल़ी करै प्रैश्शअ करा, तिहअ ई लागणअ तम्हां का इना बैणा करै थोघ कि सत्त किज़ै आसा। तम्हैं रहै इना गल्‍ला राम्बल़ै करै शूणैं लागी ज़ेभै तैणीं म्हारअ प्रभू ईशू फिरी निं एछे। तेभै भैणीं राच अर मसीहो प्रैश्शअ च़मकणअ थारै दिलै। ज़िहअ भैणूं तारअ राच भैणै का आजी च़मका।

20 पर अह आसा ज़रूरी कि तम्हैं लआ ऐहा गल्‍ला समझ़ी कि परमेशरे गूरै बोलै दै बैण तम्हैं पबित्र शास्त्रा दी पहल़ा तिंयां गल्‍ला आसा तिन्‍नां का परमेशरै आप्पै प्रगट किई दी। कोहै निं आप्पै तेतो मतलब समझ़ी सकदअ। 21 किल्हैकि परमेशरे कोही गूरै निं किछ़ै गल्‍ला आपणैं साबै या कहा होरीए बोलै बोली। पर पबित्र आत्मां करा ती तिन्‍नां आपणैं काबू अर तिंयां करा तै तिन्‍नां ई गल्‍ला प्रगट ज़ुंण परमेशर च़ाहा त प्रगट करनअ।