ओबेदिया 1

1 ✝ 1:1 ईशा. 34:5-17; 63:1-6; जेर. 49:7-22; एज. 25:12-14; 35:1-15; आम. 1:11,12; मिक. 1:2-5 ईंयां आसा ओबेदिया खोज़ी दी गल्‍ला ज़ुंण तेऊ का मालक बिधाता एदोम देशे बारै धैनै-सुपनै खोज़ी।

एदोम देशो बनाश

बिधाता छ़ाडै देशा-देशा सेटा लै आपणैं दूत इहअ खोज़दै,

"आपणीं सैना झाल़ा संघा हआ एदोम देशा संघै जुधा लै तैर।

2 एदोम, मंऐं निं देशा-देशे मणछा जैंदरी तेरअ किछ़ ज़ोर डाहअ।

तिन्‍नां निं तेरअ कोही अदर करनअ!

3 ताह लागअ तेरै आपणैं ई घमंडा करै धोखअ,

तेरी राज़धानी आसा बडी-बडी टोल्हा करै च़िणैं दै गहल़,

अर तूह आसा उछ़टी धारा बस्सअ द।

तूह करा एही शरेरी गल्‍ला, ‘मुंह निं इधा का उंधै कोह थुआल़ी सकदअ!’

4 एही ता आसा तूह मुक्षरले कोल्हा ज़िहअ उछ़टी ज़ैगा बस्सअ द,

ज़िहअ कि तेरअ घर आसा सरगे तारै जैंदरी,

तज़ी बी थुआल़णअ मुंह तूह धरनीं।

5 ज़ेभै राची च़ोर एछा, तिंयां च़ोरा ज़ेतरअ तिन्‍नों दिल बोला तेतरअ।

ज़ेभै लोग दाख चोल़ा, तेथ छ़ुटा बेला दी पाचा मांझ़ै तिन्‍नां का धख एही।

पर तेरै दुशमणै किअ तूह पठी रित्तअ।

6 तिन्‍नैं लुटै एसाबे आद-लुआदे खज़ानै ज़ात पठी!

7 तेरी साथा ज़ुल़ै दै सोभी राज़ै दैनअ ताल्है धोखअ,

तिन्‍नैं दरल़ाऊअ तूह तेरी आपणीं हदा भितरा लै।

ताह संघै मेल़-ज़ोल़े करार करनै आल़ै ज़ितै ताखा ई।

ताह संघै रोटी खाणैं आल़ै तेरै साथी आसा ताल्है ई ज़ज़ाल़ छ़ैअ द,

तिंयां बोला ताल्है इहअ, ‘तेऊ निं समझ़ ई आथी!’"

8 बिधाता बोला इहअ,

"एदोम, ज़ेभै इहअ हणअ, तेभै करनी मुंह तेरी सारी अक्ल खतम,

तिन्‍नां धारे समझ़कार पाणै मुंह सोभ मारी ज़ेथ एसाबे आद-लुआद आसा बस्सै दै।

9 तेमान नगरीए मशूर जोधे हिम्मत बी चुटणीं पठी,

तेरी धारा बस्सै दै एसाबे आद-लुआद पाणै मुंह सोभ मारी।

सह कशूर ज़ेता पिछ़ू एदोम देशा लै सज़ा हुई

10 एसाब, तंऐं लुटै आपणैं ई भाई-बंध!

तंऐं पाऐ आपणैं भाऊ याकबे आद-लुआद मारी,

ताह लागणअ शर्मिंदै हणअ, अर तूह हणअ सदा लै खतम।

11 ज़धू पराऐ देशा का आऐ दै दुशमणै तेरै भाऊ याकबे ज़ैदात लुटी डेऊऐ,

ज़धू परदेसी सैना एरुशलेम नगरी अर आप्पू मांझ़ै ज़ैदात बांडणां लै परच़ी पाई,

तूह रहअ दूर खल़्हुई, ज़िहअ कि तूह त तिन्‍नां लुटणैं आल़ैओ साथी!

12 तेरै भाई-बंध यहूदा लै ती खास्सी आफ़त पल़ी दी।

तूह रहअ तिन्‍नें बूरी दशा हंदी भाल़अ लागी!

ज़धू यहूदा मुल्खे लोगा लै आफ़त ती पल़ी दी, अर तिंयां मरदै तै लागै दै,

तूह त तेता लै खुश हुअ द! ताह निं इहअ लागा त करनअ।

13 तधू निं ताह मेरी परज़े नगरी भितरी एछणअ लागा त।

तूह रहअ तधू तिन्‍नें बूरी दशा हंदी भाल़अ लागी! ताह निं इहअ लागा त करनअ।

एकी बाखा ती तिन्‍नां लै आफ़त पल़ी दी अर तंऐं लुटी तिन्‍नें धन-माया!

ताह निं इहअ लागा त करनअ।

14 तिंयां तै आपणीं ज़ान बच़ाऊंणा लै ठुर्हदै लागै दै,

तूह त च़फै दी खल़्हुई तिन्‍नां मारदअ लागअ द! ताह निं इहअ लागा त करनअ।

तेऊ बनाशा का ज़ुंण तेरै भाई-बंध बच़ै, तिंयां बझ़ैल़ै तंऐं दुशमणा का ढाकणैं!

ताह निं इहअ लागा त करनअ।

बिधाता करनअ देशा-देशो नसाफ

15 सह धैल़ी आसा नेल़ ज़ेभै मुंह बिधाता देशा-देशो नसाफ करनअ।

एदोम, ज़िहअ तंऐं किअ, ताल्है बी हणअ तिहअ ई।

ज़ुंण तंऐं दैनअ, सह फिरनअ ताल्है बापस।

16 मेरी पबित्र धारा झुटअ मेरी परज़ा इज़राईली

मेरै प्रिहै का मेरै रोश्शो कल़ुअ घुप्पू।

पर तिन्‍नां ओरी-पोरीए देशा झुटणअ तेता का बी खास्सअ कल़ुअ, ज़ुंण मेरी सज़ा आसा।

तिन्‍नां झुटणअ, संघा हणैं तिंयां पठी खतम।

खिरी हणीं इज़राईले ज़ीत

17 पर मेरी परज़ा मांझ़ै बच़ै दै बस्सणै सियोन धारा।

एरुशलेम नगरी हणीं भिई पबित्र ज़ैगा।

याकबे आद-लुआदा भेटणअ भिई तिन्‍नें आपणीं ज़ैगा हक।

18 याकबे आद-लुआद हणैं आगी ज़िहै,

युसुफे आद-लुआद हणैं लुप्पी ज़िहै।

तिन्‍नां पाणअ एसाबे आद-लुआद भुखलै ज़िहअ दहई।

एसाबे खिंबा दी निं एक बी ज़िऊंदअ बच़णअ।

अह गल्‍ल डाही मंऐं बिधाता बोली।

19 यहूदा मुल्खे दखणा बाखा मुल्खे लोगा करनअ एदोम देशै कबज़अ,

धारा गोधै सऊंऐं मुल्खे लोगा करनअ पलिश्ती देशै कबज़अ।

इज़राईली गिम्मणअ एप्रैम धारा बाखलअ मुल्ख अर सामरी मुल्ख आप्पू लै।

बिन्यामीन गोत्रा आल़ै करनअ गलाद मुल्खै कबज़अ।

20 उतरा बाखे इज़राईली एछणैं गलामी का बडी सैना ज़िहै फिरी,

तिन्‍नां करनअ कनानी लोगे ज़ैगा सारपत नगरी तैणीं भिई कबज़अ।

एरुशलेम नगरी का गलामी दी डेऊऐ दै ज़ुंण सपराद नगरी आसा बस्सै दै,

तिन्‍नां करनअ कनान दखणा बाखा मुल्खे सोभी नगरी दी कबज़अ।

21 बच़ाऊंणै आल़ै एछणैं सियोन धारा अर तिन्‍नां करनअ तैहा धारा राज़

ज़ेथ एसाबे आद-लुआद आसा बस्सै दै।

तेखअ हणअ हुंह बिधाता आप्पै राज़अ!"