1 भाई-बैहणीओ, मेरी सोठ आसा एही अर हुंह करा परमेशरा का इज़राईली मणछा लै एही अरज़ कि तिन्नां लोल़ी उद्धार भेटअ। 2 मुखा आसा थोघ कि तिन्नां हआ हर बगत परमेशरे च़ाकरी करनैओ खैल पर असली दी परमेशरे च़ाकरी किहअ करै लागा करनी, तैहा बिधीओ निं तिन्नां का थोघै। 3 किल्हैकि तिन्नां का निं ऐहा गल्लो थोघ आथी कि परमेशर किहअ करै बणाआं मणछा आप्पू संघै धर्मीं। तिंयां च़ाहा आपणैं बधाने साबै परमेशरा सम्हनै धर्मीं हणअ अर तिहअ निं तिंयां करदै ज़िहअ तिन्नां लै परमेशर बोला।
4 मसीहा हेरअ सह मकसद पूरअ करी ज़ेता लै बधान दैनअ त, एतो नतिज़अ निखल़अ इहअ कि ज़ुंणी बी तेऊ दी विश्वास किअ तिंयां बणाऐं धर्मीं।
उद्धार आसा सोभी लै
5 मोसा गूरै आसा लिखअ द कि बधाने साबै धर्मीं हणां लै आसा मणछा लै बधाने सोभै हुकम पूरै करनै ज़रूरी।10:5 लेब. 18:5
6 पर ज़ुंण मसीहा दी विश्वास करनै करै परमेशरै धर्मीं बणाऐं, तिन्नां लै बोला इहअ, "तम्हैं निं इहअ समझ़ी, ‘मसीहा उंधै आणना लै उझै सरगा लै कुंण च़ाल्लअ उखल़ी?’ 7 अर ‘मसीहा मूंऐं दै मांझ़ा का ज़िऊंदै करदअ उंधै डुघै दी कुंण डेऊणअ।’"
8 पर ज़ुंण मसीहा दी विश्वास करा तिन्नां लागा इहअ बोल़णअ ज़िहअ पबित्र शास्त्रा दी आसा लिखअ द,
"परमेशरो बैण निं ताखा दूर आथी,
तूह सका तेऊ आपणैं होठा का बोली अर आपणैं मन्नैं डाही।"
अह आसा सह ई बैण ज़ुंण हाम्हैं प्रच़ार करा कि लोग मसीहा दी विश्वास करे। 9 अह बैण आसा इहअ कि, ज़ै तम्हां मांझ़ै ज़ुंण बी सोभी नदरी ऐहा गल्ला मने अर इहअ विश्वास करे कि ईशू आसा प्रभू अर सह किअ परमेशरै मरी करै ज़िऊंदअ, परमेशरा करनअ तेरअ उद्धार।10:9 शधा. 16:31
10 हाम्हैं करा आपणैं मन्नैं विश्वास अर परमेशर बणाआं हाम्हां आप्पू संघै धर्मीं। ज़ुंण हाम्हैं विश्वास करा तेता बोला हाम्हैं आपणैं होठा का अर परमेशर करा म्हारअ उद्धार।
11 किल्हैकि ईशायाह आसा पबित्र शास्त्रा दी मसीहे बारै इहअ लिखअ द, "ज़ुंण बी तेऊ दी विश्वास करे सह निं शर्मिंदअ हणअ।"10:11 जेर. 17:7
12 परमेशर आसा सोभिओ मालक, सह निं यहूदी अर यूनानी दी किछ़ै भेद करदअ। सह शूणां सोभिए ज़ुंण तेऊओ नाअं लआ। 13 किल्हैकि पबित्र शास्त्रा दी आसा इहअ लिखअ द, "ज़ुंण बी प्रभू का मज़त मांगे, सह जाणअ बच़ी।"10:13 शधा. 2:21; जोए. 2:32
इज़राईली निं खुशीओ समाद मनअ
14 पर प्रभू का मज़त मांगणै का आजी आसा तिन्नां तेऊ दी विश्वास करने ज़रुरत। तिंयां तेऊ दी विश्वास करी सके तेता का आजी आसा तिन्नां तेऊए बारै शुणने ज़रुरत अर तिंयां प्रभूए बारै शूणीं सके तेता लै हुअ तिन्नां का कहा खोज़णअ ज़रूरी। 15 ज़ुंण मसीहे बारै तिन्नां का खोज़े तिंयां निं तेभै तैणीं किछ़ करी सकदै ज़ेभै तैणीं परमेशर तिन्नां आप्पै निं छ़ाडे।
ज़ै कुंण विश्वासी प्रच़ार करे, अह हणीं शास्त्रा दी लिखी दी गल्ला ज़ेही, "तिन्नां लोगो एछणअ किअ भलअ हआ ज़ेभै तिंयां खुशीओ समाद खोज़ा।"10:15 ईशा. 52:7; नहू. 1:15
16 पर सोभी निं खुशीए समादा दी विश्वास किअ, परमेशरो गूर ईशायाह बोला आसा इहअ बोलअ, "हाम्हैं ज़ुंण समाद खोज़अ तेतो निं कोही विश्वास किअ।"10:16 ईशा. 53:1
17 "विश्वास हआ समाद शूणीं अर समाद आसा मसीहे बारै बैण।"
18 हुंह पुछ़ा इहअ कि इज़राईली कै असली दी सह समाद शूणअ? हाँ, तिन्नैं शूणअ किल्हैकि पबित्र शास्त्रा दी आसा लिखअ द,10:18 भज. 19:4
"तिन्नों समाद पुजअ सारी पृथूई दी
अर तिन्नें बैण पुजै सारै संसारे हर ज़ैगा।"
19 तेखअ पुछ़ा हुंह इहअ कि इज़राईले लोगा का कै थोघै निं त? पैहलै, परमेशरै मोसा का इहअ बोलअ,10:19 बधा. 32:21
"मुंह पज़ेरनी होरी ज़ाती करै थारै मन्नैं ज़ल़ण
ज़ुंण ज़ाती निं आथी,
मुंह फरेऊंणी एकी ऐडी ज़ाती करै तम्हां लै ज़ल़ण।"
20 तेखअ बोला ईशायाह बडै हैअ डाही करै कि परमेशर बोला इहअ,
"ज़ुंण मुंह नांईं लोल़दै तै तिन्नां गअ हुंह भेटी,
अर ज़ुंण मुंह पुछ़दै बी नांईं तै तिन्नां दी हुअ हुंह प्रगट।"
21 पर इज़राईलीए बारै बोला परमेशर इहअ,10:21 ईशा. 65:1-2
"मंऐं डाहै सारी धैल़ी एकी नशूंण
अर ऐडी परज़ा बाखा हाथ फुआरी।"