1 ज़ुंण विश्वासा दी दुबल़अ आसा तेऊ निंयां आपणीं संगती दी, पर ज़ै तेऊ बैहम आसा, तेऊ संघै निं ऐहा गल्‍ला दी दोश लाई हठल़दै लागी कि तेऊओ विश्वास निं थारै विश्वासा ज़िहअ आथी। 2 एकी आसा विश्वास कि सोभ किछ़ खाणअ आसा ठीक, पर ज़ुंण विश्वासा दी दुबल़अ आसा, सह खाआ शाग-पाच ई।

3 ज़ुंण शिखा खाआ सह निं तेऊ मणछा बृथा समझ़ी ज़ुंण शिखा निं खांदअ, अर नां नमासी शिखा खाणैं आल़ै लै दोश लाई, किल्हैकि परमेशरै आसा तिंयां दुहै मनै दै। 4 तूह कुंण हआ ज़ुंण दुजै परमेशरे दासा लै दोश लाआ? तेऊओ विश्वासा दी बणी रहणअ अर नांईं रहणैंओ नातअ आसा तेऊए मालका संघै ता सह रहणअ विश्वासा दी पाक्‍कअ, किल्हैकि प्रभू सका तेऊ विश्वासा दी पाक्‍कै डाही।

5 ठीक इहअ ई, कई मना एकी धैल़ी दुजी धैल़ी का बडी, कोऐ समझ़ा सोभी धैल़ी एक बराबर। सोभिए मन्‍नैं लोल़ी अह गल्‍ल पाक्‍की हुई कि ज़ुंण सह सोठा सह आसा ठीक। 6 ज़ुंण कहा धैल़ी मना सह करा एता एते तैणीं कि सह च़ाहा परमेशरो अदर करनअ, अर ज़ुंण शिखा खाआ, सह भिई खाआ प्रभू लै, किल्हैकि सह करा परमेशरो शूकर, अर ज़ुंण शिखा नांईं खांदअ, सह रहा प्रभूए तैणीं नमासी अर सह बी करा प्रभूओ शूकर।

7 किल्हैकि हाम्हां मांझ़ै नां कोहै आपणीं तैणीं ज़िऊंदअ, अर नां कुंण आपणीं तैणीं मरदअ आथी। 8 हाम्हैं ज़ै ज़िऊंदै आसा, प्रभू लै आसा ज़िऊंदै, अर ज़ै हाम्हैं मरा, हाम्हैं मरा प्रभू लै, हाम्हैं ज़िऊंदै रहे, च़ाहै हाम्हैं मरे, हाम्हैं सोभै आसा प्रभूए ई। 9 किल्हैकि मसीहा दैनै आपणैं प्राण एते ई तैणीं, अर तैही हुअ सह भिई ज़िऊंदअ, सह ई आसा एक्‍कै ज़हा मूंऐं दै अर ज़िऊंदै दुहै प्रभू बोला बछ़ैणा।

10 तै तूह आपणैं साथी-भाई लै दोश किल्है लाआ? तूह आपणैं साथी-भाई किल्है समझ़ा बृथा? हाम्हां लागणअ सोभी परमेशरे नसाफ राज़गाद्दी सम्हनै खल़अ हणअ, ज़ेभै तेऊ सोभिओ फैंसलअ करनअ। 11 किल्हैकि पबित्र शास्त्रा दी आसा लिखअ द,✝

"प्रभू बोला इहअ, ‘हुंह काढा आपणीं ज़िन्दगीए सोह,

हरेक मणछा टेक्‍कणअ मुंह सेटा माथअ

अर सोभिए ज़िभा दी हणअ परमेशरो ई नाअं।’"

12 तैही लागणअ हाम्हां सोभी बी परमेशरा सम्हनै आपणैं-आपणैं कामों साब-कताब दैणअ।

13 ता, ऐबै निं हाम्हां आजू पोर्ही एकी-दुजै लै दोश लाणअ, पर तम्हैं करा इहअ बच़ार पाक्‍कअ कि आपणैं विश्वासी भाईए सम्हनै निं इहअ कोई काम करी ज़ेता करै तेरअ साथी-भाई परमेशरा दी विश्वास करनअ छ़ाडे।

14 ऐबै लागअ मुखा थोघ अर प्रभू ईशू मसीहा दी खुल्ही मेरी आछी, किछ़ू खाणैं च़िज़ा खाई करै निं छ़ोत लागदी पर ज़ुंण इहअ समझ़ा कि किज़ू खाई करै लागणीं तेऊ छ़ोत, तेऊ लै आसा सह छ़ोतली। 15 ज़ै तेरअ भाई तेरै खाणैं पिणें बज़्हा दुखी होए, तै निं तूह परमेशरे साबै झ़ूरी करदअ, ज़ै तेरै शिखा खाणैं करै तेरअ साथी-भाई परमेशरा दी विश्वास करनअ छ़ाडे, तै निं तूह तेता खाई। मसीहा आसा तेरै तेऊ साथीए तैणीं आपणीं ज़ान दैनी दी।

16 ज़ै किज़ै इहअ होए ज़ेता लै तूह आपणैं साबै इहअ समझ़ा कि अह आसा भलअ पर तेता करै तेरअ साथी-भाई विश्वासा का दूर होए, एता लै आसा इहअ ई ठीक कि तूह निं तेता करी ताकि होर हाम्हां लै दोश नां लाए। 17 किल्हैकि म्हारी ज़िन्दगी दी परमेशरो राज़ निं खाणअ-पिणअ आथी। पर असली गल्‍ल आसा परमेशरा संघै धर्मीं हणअ अर मेल़-ज़ोल़ ज़ुंण पबित्र आत्मां दैआ।

18 ज़ुंण एऊ साबै मसीहे च़ाकरी करा, तेऊ करै हआ परमेशर खुश अर मणछा मांझ़ै बी हआ तेऊओ अदर। 19 तैही लागा हाम्हां तिंयां ई गल्‍ला करनी अर तेऊ ई कामां दी लागी रहणअ, ज़ेता करै सोभी संघै मेल़-ज़ोल़ अर सोभिए विश्वासा दी बढोतरी हआ।

20 कई रंगे खाणें-पिणें तैणीं निं परमेशरै किअ द काम ज़ांऐं पाई। परमेशर निं किछ़ू गल्‍ला खाणां लै नांईं करदअ। पर ज़ै तेरै खाणैं-पिणैं करै दुजअ मणछ विश्वासा का दूर हई पापा दी पल़े, तै आसा सह गलत। तूह डाहा तेऊओ परमेशरा सेटा डेऊणेओ दुआर हूल़ी।

21 भलअ ता आसा इहअ कि नां तूह शिखा खाई, अर नां शराब झुटी, अर नां इहअ काम करी ज़ेता करै तेरअ साथी-भाई परमेशरा दी विश्वास करनअ छ़ाडे।

22 तेरअ सका इहअ विश्वास हई कि ज़ुंण तूह करा तेथ निं किछ़ै गलत आथी, पर तेऊ डाह तूह आप्पू अर परमेशरा मांझ़ै गुप्त। परमेशर दैआ तेऊ मणछा लै बर्गत ज़ुंण आपणीं गल्‍ला दी आप्पू दोशी निं मंदअ आथी ज़हा सह ठीक समझ़ा। 23 पर ज़ै तेरै दिलै किज़ू खाणैं पिछ़ू बैहम होए अर खिरी तूह खाए तै आसा तूह गलत, किल्हैकि ज़ुंण तंऐं किअ सह निं तंऐं तिहअ किअ ज़ुंण तूह दिलै विश्वास करा।