1-3 ऐबै ज़ै हाम्हां परमेशरे झ़ूरी का कोहै ज़ुदअ निं करी सकदअ, तै इज़राईल अर मेरै यहूदी मणछ परमेशरा का दूर किल्है आसा? हुंह आसा तिन्‍नें बारै दुखी अर मुंह हआ कबल्‍लअ तिन्‍नें तैणीं आपणैं दिलै दुख। हुंह च़ाहा एतरै तैणीं कि, ज़ै मुल्है मेरै यहूदी भाई बच़ाऊंणे तैणीं फिटक बी लागे या हुंह मसीहा का बी किल्है निं होए दूर हुंह सका तेता बी करी ज़ै इहअ करै मेरै तिन्‍नां यहूदी भाई उद्धार होए। हुंह बोला मसीहा शाजत मनी शुचअ। पबित्र आत्मां अर मेरी सोर-समझ़ बी दैआ ऐहा गल्‍ले शाजत कि ज़ुंण गल्‍ला मंऐं बोली तिंयां आसा शुची।✝9:1-3 लुआ. 32:32

4 तिंयां आसा मुंह ज़िहै इज़राईली मणछ, परमेशरै दैनअ तिन्‍नां लै आपणीं लुआद हणैंओ हक अर प्रतप्प, करार, बधान, च़ाकरी, अर कई च़िज़े बाहिदै आसा तिन्‍नां लै ई किऐ दै।✝9:4 भज. 147:19

5 आबराम, इसहाक अर राज़अ दाबेद बी आसा तिन्‍नें ई दाद-बाब, अर मसीहा बी आसा देहीए साबै तिन्‍नां ई मांझ़ै इज़राईली ज़ुंण सोभी लै आसा परम प्रधान परमेशर जुगा-जुगा लै च़ाकरी अर ज़ै-ज़ैकार करनै जोगी। एवमस्तू।

6 पर इहअ निं आथी कि परमेशर निं आपणीं करार पूरी करी सकअ, किल्हैकि इज़राईले लुआद निं असली दी सारै परमेशरे आपणैं लोग आथी! 7 नां तिंयां आबरामे खिंबा दी पैईदा हणैं पिछ़ू तिन्‍नां लै परमेशरे असली लुआद बोल्दै। किल्हैकि परमेशरै बोलअ आबरामा लै, "ज़ुंण तेरै शोहरू इसहाके खिंबा का पैईदा हणैं तिंयां ई हणैं आजू तेरी आद-लुआद।"✝9:7 इब्रा. 11:18

8 मतलब ऐहा संसारे देहीए साबै ज़ुंण पैईदा हुऐ तिंयां निं परमेशरे लुआद आथी पर ज़सरै बारै परमेशरै आबरामा का करार किई ती तिंयां ई गणै आजू आबरामे आद-लुआद। 9 किल्हैकि करारो बैण आसा अह, "ऐहा ई ऋता एछणअ हुंह आगली साला भिई फिरी, ज़ेभै हुंह एछणअ, तेभा लै जाणअ सारा का शोहरू हई।"✝9:9 मूल. 18:10; 21:2

10 सिधअ इहअ ई निं, म्हारै दाद-बाब इसहाका ई करै हुऐ आजू तेऊए लाल़ी रिबका का दोगल़ शोहरू।✝9:10 मूल. 25:21

11 अज़ी नां तिंयां शोहरू ज़ल्मैं तै अर नां तिन्‍नैं किज़ै भलअ या बूरअ किअ त, परमेशरै बोलअ रिबका लै कि तेरै ज़ेठै शोहरू करनी तेरै कान्हैं शोहरूए च़ाकरी। तेऊ बोली अह ऐहा गल्‍ला रहैऊंणा लै कि सह छ़ांटा आपणीं मरज़ी दी इहअ निं कि तिन्‍नां मांझ़ै किअ तेता लै कुंणी किज़ै काम। 12 इहअ करै आसा परमेशरे सोठ तेऊए छ़ांटणें साबै, कामें साबै निं आथी, पर शादणैं आल़ै दी लोल़ी बणी रही।✝9:12 मूल. 25:23

13 ज़िहअ पबित्र शास्त्रा दी आसा लिखअ द, "मंऐं किई याकबा संघै झ़ूरी अर एसाब समझ़अ कपैरअ।"✝9:13 मला. 1:2-3

14 हाम्हां कै इहअ बोल़णअ कि परमेशर आसा बूरै करनै आल़अ? इहअ निं कधि हई सकदअ! 15 परमेशरै बोलअ आपणैं गूर मोसा का,✝9:15 लुआ. 33:19

"ज़हा लै बी हुंह झींण करनी च़ाहूं,

तेऊ लै करनी मुंह झींण,

अर ज़हा लै मुंह क्रिप्पा करनी च़ाहूं,

तेऊ लै करनी मुंह क्रिप्पा।"

16 अह गल्‍ल आसा परमेशरे हाथै कि कहा लै करनी तेऊ झींण। हाम्हैं नां एता छ़ांटी सकदै अर नां एता लै काम करी सकदै।

17 किल्हैकि पबित्र शास्त्र खोज़ा हाम्हां का कि परमेशर बोला मिसर देशे माहा राज़ै लै, "मंऐं आसा तूह राज़अ एते तैणीं बणाअं द कि ताह दी हुंह आपणीं शगती रहैऊं अर होर मेरअ नाअं सारी पृथूई दी खोज़े।"✝9:17 लुआ. 9:16

18 तेखअ ज़हा लै परमेशर च़ाहा, तेऊ लै करा सह झींण, अर ज़हा लै सह च़ाहा, तेऊ डाहा सह हठू बणाईं।

19 तेखअ बोल़णअ कई लोगा मुल्है इहअ, "ज़ै इहअ थिऐ किहअ करै सका परमेशर हाम्हां लै बोली कि हाम्हैं आसा गलत? किल्हैकि ज़ुंण परमेशर करनअ च़ाहा तेता लै निं तेऊ कोहै रोक्‍की सकदअ!"

20 आरा मणछा, "तूह कुंण आसा अर किज़ै च़ीज़ आसा ज़ुंण परमेशरा संघै फिरा हठल़दअ?" कै पारू आप्पै तेऊ आपणैं बणाणैं आल़ै खमारा का इहअ सुआल पुछ़ी सका, "हुंह तंऐं इहअ किल्है बणाअं?" 21 खमारो कै माट्टै दी हक निं आथी कि सह एकी पाटा का एक भांडअ पाणीं डाहणां लै, अर एक भांडअ सका शणैऊंआं डाहणां लै बणाईं?✝9:21 ईशा. 64:8

22 इहअ ई आसा परमेशरा बी हक कि परमेशर आपणअ रोश्श अर तिन्‍नां दी आपणीं शगती रहैऊए ज़ुंण खतम करनै जोगी आसा। पर तज़ी बी करा सह तिन्‍नां लै सबर।✝9:22 सैणीं. 16:4

23 तेऊ किअ इहअ एते तैणीं कि सह च़ाहा ऐहा गल्‍ला रहैऊंणअ कि सह केतरअ महान आसा, ज़ेभै सह तिन्‍नां मणछा लै झींण करा ज़ुंण तेऊ आपणैं प्रतप्पे साझ़ू हणां लै आसा शादै दै। 24 च़ाऐ हाम्हैं यहूदी होए, च़ाऐ हाम्हैं होरी ज़ातीए होए, हाम्हैं आसा तिंयां ज़ुंण तेऊ आसा छ़ांटै दै।✝9:24 इफि. 3:6; रोम. 3:29

25 ज़िहअ तेऊ परमेशरै गूर होशे कताबा दी बी आसा बोलअ द कि✝9:25 होश. 2:23

"ज़ुंण मेरी परज़ा निं आथी ती,

तिन्‍नां लै बोल़णअ मुंह ऐबै आपणीं परज़ा

ज़हा संघै मुंह झ़ूरी नांईं ती आथी

तिन्‍नां संघै करनी मुंह ऐबै झ़ूरी।"

26 अर

"ज़िधी तिन्‍नां लै इहअ बोलअ त,

‘तम्हैं निं मेरी परज़ा आथी।’

तिधी बोल़णअ इहअ,

‘तम्हैं आसा ज़िऊंदै परमेशरे लुआद।’"

27 ईशायाह गूर बी बोला इज़राईलीए बारै इहअ,✝9:27 एज. 6:8

"इज़राईले लोग च़ाऐ समुंदरे रेता ज़िहै खास्सै बी किल्है निं होए,

तिन्‍नां मांझ़ै आसा थोल़ै ई ज़सरअ उद्धार हणअ।

28 किल्हैकि प्रभू दैणीं संसारा लै पूरी अर छ़ेक्‍कै सज़ा, ज़ुंण लोग पृथूई दी रहा

ज़िहअ करना लै तेऊ बोलअ त।"

29 ज़िहअ परमेशरे गूर ईशायाह पैहलै बी बोलअ त,✝9:29 ईशा. 1:9

"स्वर्गे सारी सैने मालक बिधाता

ज़ै थारी आद-लुआदा मांझ़ै धख मणछ ज़िऊंदै निं छ़ाडै हंदै,

तै गई ती एरुशलेम नगरी पठी खतम हई,

ज़िहअ सदोम अर अमोरा नगरी लै हुअ त।

30 "तै सका हाम्हैं इहअ बोली कि होरी ज़ातीए लोग ज़ुंणी होरी ज़ातीए लोगै धर्मीं हणां लै किछ़ बी निं किअ, तिंयां बणाऐं परमेशरै आप्पू संघै धर्मीं किल्हैकि तिन्‍नैं किअ तेऊ दी विश्वास।" 31 पर इज़राईली मणछ ज़ुंण मोसा गूरे बधाना करै परमेशरा संघै धर्मीं हणअ च़ाहा तै तिंयां निं धर्मीं हई सकै।

32 तिंयां किल्है निं धर्मीं गणै? किल्हैकि तिंयां च़ाहा तै बधाने साबै काम करी धर्मीं हणअ नां कि परमेशरा दी विश्वास करी। तिन्‍नैं समझ़अ मसीहा बृथा ज़ुंण तिन्‍नां लै ठोहल़ा लाणैं आल़ै पात्थरा ज़िहअ हुअ। 33 ज़िहअ परमेशरै पबित्र शास्त्रा दी आसा बोलअ द,✝9:33 ईशा. 28:16

"भाल़ा, एरुशलेम लाअ मंऐं एक ढेसै लागणे आल़ी टोल्हा ज़िहअ

अर ठोहल़ लाणैं आल़ै पात्थरा ज़िहअ डाही,

ज़ुंण तेता दी विश्वास करे

सह निं शर्मिंदअ हणअ।"