דִּרְשׁוּ יְהוָה וְעֻזּוֹ בַּקְּשׁוּ פָנָיו תָּמִֽיד ׃

וְאַתָּה שְׁלֹמֹֽה ־ בְנִי דַּע אֶת ־ אֱלֹהֵי אָבִיךָ וְעָבְדֵהוּ בְּלֵב שָׁלֵם וּבְנֶפֶשׁ חֲפֵצָה כִּי כָל ־ לְבָבוֹת דּוֹרֵשׁ יְהוָה וְכָל ־ יֵצֶר מַחֲשָׁבוֹת מֵבִין אִֽם ־ תִּדְרְשֶׁנּוּ יִמָּצֵא לָךְ וְאִם ־ תַּֽעַזְבֶנּוּ יַזְנִיחֲךָ לָעַֽד ׃

דִּרְשׁוּ יְהוָה בְּהִמָּצְאוֹ קְרָאֻהוּ בִּֽהְיוֹתוֹ קָרֽוֹב ׃

מִזְמוֹר לְדָוִד בִּהְיוֹתוֹ בְּמִדְבַּר יְהוּדָֽה ׃

טוֹב לַחֲסוֹת בַּיהוָה מִבְּטֹחַ בָּאָדָֽם ׃

טוֹב לַחֲסוֹת בַּיהוָה מִבְּטֹחַ בִּנְדִיבִֽים ׃

²⁹ נֹתֵן לַיָּעֵף כֹּחַ וּלְאֵין אוֹנִים עָצְמָה יַרְבֶּֽה ׃

³⁰ וְיִֽעֲפוּ נְעָרִים וְיִגָעוּ וּבַחוּרִים כָּשׁוֹל יִכָּשֵֽׁלוּ ׃

³¹ וְקוֹיֵ יְהוָה יַחֲלִיפוּ כֹחַ יַעֲלוּ אֵבֶר כַּנְּשָׁרִים יָרוּצוּ וְלֹא יִיגָעוּ יֵלְכוּ וְלֹא יִיעָֽפוּ ׃ פ

מָצָא אִשָּׁה מָצָא טוֹב וַיָּפֶק רָצוֹן מֵיְהוָֽה ׃

נִדְרַשְׁתִּי לְלוֹא שָׁאָלוּ נִמְצֵאתִי לְלֹא בִקְשֻׁנִי אָמַרְתִּי הִנֵּנִי הִנֵּנִי אֶל ־ גּוֹי לֹֽא ־ קֹרָא בִשְׁמִֽי ׃

יְשַׁלֵּם יְהוָה פָּעֳלֵךְ וּתְהִי מַשְׂכֻּרְתֵּךְ שְׁלֵמָה מֵעִם יְהוָה אֱלֹהֵי יִשְׂרָאֵל אֲשֶׁר ־ בָּאת לַחֲסוֹת תַּֽחַת ־ כְּנָפָֽיו ׃

וּבִקַּשְׁתֶּם אֹתִי וּמְצָאתֶם כִּי תִדְרְשֻׁנִי בְּכָל ־ לְבַבְכֶֽם ׃

אַשְׁרֵי נֹצְרֵי עֵדֹתָיו בְּכָל ־ לֵב יִדְרְשֽׁוּהוּ ׃

¹ וַעֲזַרְיָהוּ בֶּן ־ עוֹדֵד הָיְתָה עָלָיו רוּחַ אֱלֹהִֽים ׃

² וַיֵּצֵא לִפְנֵי אָסָא וַיֹּאמֶר לוֹ שְׁמָעוּנִי אָסָא וְכָל ־ יְהוּדָה וּבִנְיָמִן יְהוָה עִמָּכֶם בִּֽהְיֽוֹתְכֶם עִמּוֹ וְאִֽם ־ תִּדְרְשֻׁהוּ יִמָּצֵא לָכֶם וְאִם ־ תַּעַזְבֻהוּ יַעֲזֹב אֶתְכֶֽם ׃ ס

³ וְיָמִים רַבִּים לְיִשְׂרָאֵל לְלֹא ׀ אֱלֹהֵי אֱמֶת וּלְלֹא כֹּהֵן מוֹרֶה וּלְלֹא תוֹרָֽה ׃

⁴ וַיָּשָׁב בַּצַּר ־ לוֹ עַל ־ יְהוָה אֱלֹהֵי יִשְׂרָאֵל וַיְבַקְשֻׁהוּ וַיִּמָּצֵא לָהֶֽם ׃

⁵ וּבָעִתִּים הָהֵם אֵין שָׁלוֹם לַיּוֹצֵא וְלַבָּא כִּי מְהוּמֹת רַבּוֹת עַל כָּל ־ יוֹשְׁבֵי הָאֲרָצֽוֹת ׃

⁶ וְכֻתְּתוּ גוֹי ־ בְּגוֹי וְעִיר בְּעִיר כִּֽי ־ אֱלֹהִים הֲמָמָם בְּכָל ־ צָרָֽה ׃

⁷ וְאַתֶּם חִזְקוּ וְאַל ־ יִרְפּוּ יְדֵיכֶם כִּי יֵשׁ שָׂכָר לִפְעֻלַּתְכֶֽם ׃ ס

⁸ וְכִשְׁמֹעַ אָסָא הַדְּבָרִים הָאֵלֶּה וְהַנְּבוּאָה עֹדֵד הַנָּבִיא הִתְחַזַּק וַיַּעֲבֵר הַשִּׁקּוּצִים מִכָּל ־ אֶרֶץ יְהוּדָה וּבִנְיָמִן וּמִן ־ הֶעָרִים אֲשֶׁר לָכַד מֵהַר אֶפְרָיִם וַיְחַדֵּשׁ אֶת ־ מִזְבַּח יְהוָה אֲשֶׁר לִפְנֵי אוּלָם יְהוָֽה ׃

⁹ וַיִּקְבֹּץ אֶת ־ כָּל ־ יְהוּדָה וּבִנְיָמִן וְהַגָּרִים עִמָּהֶם מֵאֶפְרַיִם וּמְנַשֶּׁה וּמִשִּׁמְעוֹן כִּֽי ־ נָפְלוּ עָלָיו מִיִּשְׂרָאֵל לָרֹב בִּרְאֹתָם כִּֽי ־ יְהוָה אֱלֹהָיו עִמּֽוֹ ׃ פ

¹⁰ וַיִּקָּבְצוּ יְרוּשָׁלִַם בַּחֹדֶשׁ הַשְּׁלִישִׁי לִשְׁנַת חֲמֵשׁ ־ עֶשְׂרֵה לְמַלְכוּת אָסָֽא ׃

¹¹ וַיִּזְבְּחוּ לַיהוָה בַּיּוֹם הַהוּא מִן ־ הַשָּׁלָל הֵבִיאוּ בָּקָר שְׁבַע מֵאוֹת וְצֹאן שִׁבְעַת אֲלָפִֽים ׃

¹² וַיָּבֹאוּ בַבְּרִית לִדְרוֹשׁ אֶת ־ יְהוָה אֱלֹהֵי אֲבוֹתֵיהֶם בְּכָל ־ לְבָבָם וּבְכָל ־ נַפְשָֽׁם ׃

¹³ וְכֹל אֲשֶׁר לֹֽא ־ יִדְרֹשׁ לַיהוָה אֱלֹהֵֽי ־ יִשְׂרָאֵל יוּמָת לְמִן ־ קָטֹן וְעַד ־ גָּדוֹל לְמֵאִישׁ וְעַד ־ אִשָּֽׁה ׃

¹⁴ וַיִּשָּֽׁבְעוּ לַיהוָה בְּקוֹל גָּדוֹל וּבִתְרוּעָה וּבַחֲצֹצְרוֹת וּבְשׁוֹפָרֽוֹת ׃

¹⁵ וַיִּשְׂמְחוּ כָל ־ יְהוּדָה עַל ־ הַשְּׁבוּעָה כִּי בְכָל ־ לְבָבָם נִשְׁבָּעוּ וּבְכָל ־ רְצוֹנָם בִּקְשֻׁהוּ וַיִּמָּצֵא לָהֶם וַיָּנַח יְהוָה לָהֶם מִסָּבִֽיב ׃

¹⁶ וְגַֽם ־ מַעֲכָה אֵם ׀ אָסָא הַמֶּלֶךְ הֱסִירָהּ מִגְּבִירָה אֲשֶׁר ־ עָשְׂתָה לַאֲשֵׁרָה מִפְלָצֶת וַיִּכְרֹת אָסָא אֶת ־ מִפְלַצְתָּהּ וַיָּדֶק וַיִּשְׂרֹף בְּנַחַל קִדְרֽוֹן ׃

¹⁷ וְהַבָּמוֹת לֹא ־ סָרוּ מִיִּשְׂרָאֵל רַק לְבַב ־ אָסָא הָיָה שָׁלֵם כָּל ־ יָמָֽיו ׃

¹⁸ וַיָּבֵא אֶת ־ קָדְשֵׁי אָבִיו וְקָֽדָשָׁיו בֵּית הָאֱלֹהִים כֶּסֶף וְזָהָב וְכֵלִֽים ׃

¹⁹ וּמִלְחָמָה לֹא הָיָתָה עַד שְׁנַת ־ שְׁלֹשִׁים וְחָמֵשׁ לְמַלְכוּת אָסָֽא ׃ ס

וּבִקַּשְׁתֶּם מִשָּׁם אֶת ־ יְהוָה אֱלֹהֶיךָ וּמָצָאתָ כִּי תִדְרְשֶׁנּוּ בְּכָל ־ לְבָבְךָ וּבְכָל ־ נַפְשֶֽׁךָ ׃

דִּרְשׁוּ יְהוָה וְעֻזּוֹ בַּקְּשׁוּ פָנָיו תָּמִֽיד ׃

דִּרְשׁוּ ־ טוֹב וְאַל ־ רָע לְמַעַן תִּֽחְיוּ וִיהִי ־ כֵן יְהוָה אֱלֹהֵֽי ־ צְבָאוֹת אִתְּכֶם כַּאֲשֶׁר אֲמַרְתֶּֽם ׃

וְיִכָּנְעוּ עַמִּי אֲשֶׁר נִֽקְרָא ־ שְׁמִי עֲלֵיהֶם וְיִֽתְפַּֽלְלוּ וִֽיבַקְשׁוּ פָנַי וְיָשֻׁבוּ מִדַּרְכֵיהֶם הָרָעִים וַאֲנִי אֶשְׁמַע מִן ־ הַשָּׁמַיִם וְאֶסְלַח לְחַטָּאתָם וְאֶרְפָּא אֶת ־ אַרְצָֽם ׃

דָּלְפָה נַפְשִׁי מִתּוּגָה קַיְּמֵנִי כִּדְבָרֶֽךָ ׃

וִיהִי יְהוָה מִשְׂגָּב לַדָּךְ מִשְׂגָּב לְעִתּוֹת בַּצָּרָֽה ׃

בְּכָל ־ לִבִּי דְרַשְׁתִּיךָ אַל ־ תַּשְׁגֵּנִי מִמִּצְוֺתֶֽיךָ ׃

יִשָּׂא בְרָכָה מֵאֵת יְהוָה וּצְדָקָה מֵאֱלֹהֵי יִשְׁעֽוֹ ׃

זֶה דּוֹר דרשו מְבַקְשֵׁי פָנֶיךָ יַעֲקֹב סֶֽלָה ׃

וַיֵּצֵא לִפְנֵי אָסָא וַיֹּאמֶר לוֹ שְׁמָעוּנִי אָסָא וְכָל ־ יְהוּדָה וּבִנְיָמִן יְהוָה עִמָּכֶם בִּֽהְיֽוֹתְכֶם עִמּוֹ וְאִֽם ־ תִּדְרְשֻׁהוּ יִמָּצֵא לָכֶם וְאִם ־ תַּעַזְבֻהוּ יַעֲזֹב אֶתְכֶֽם ׃ ס

וַתִּצְלַח עָלָיו רוּחַ יְהוָה וַֽיְשַׁסְּעֵהוּ כְּשַׁסַּע הַגְּדִי וּמְאוּמָה אֵין בְּיָדוֹ וְלֹא הִגִּיד לְאָבִיו וּלְאִמּוֹ אֵת אֲשֶׁר עָשָֽׂה ׃

כִּי כֹה אָמַר יְהוָה לְבֵית יִשְׂרָאֵל דִּרְשׁוּנִי וִֽחְיֽוּ ׃

הֲלוֹא כֹה דְבָרִי כָּאֵשׁ נְאֻם ־ יְהוָה וּכְפַטִּישׁ יְפֹצֵֽץ סָֽלַע ׃ ס

גַּדְּלוּ לַיהוָה אִתִּי וּנְרוֹמְמָה שְׁמוֹ יַחְדָּֽו ׃

לְךָ ׀ אָמַר לִבִּי בַּקְּשׁוּ פָנָי אֶת ־ פָּנֶיךָ יְהוָה אֲבַקֵּֽשׁ ׃

יְראוּ אֶת ־ יְהוָה קְדֹשָׁיו כִּי ־ אֵין מַחְסוֹר לִירֵאָֽיו ׃

כֵּן ׀ דְּעֶה חָכְמָה לְנַפְשֶׁךָ אִם ־ מָצָאתָ וְיֵשׁ אַחֲרִית וְתִקְוָתְךָ לֹא תִכָּרֵֽת ׃ פ

וְאֶתְהַלְּכָה בָרְחָבָה כִּי פִקֻּדֶיךָ דָרָֽשְׁתִּי ׃

יְֽהוָה מִשָּׁמַיִם הִשְׁקִיף עַֽל ־ בְּנֵי ־ אָדָם לִרְאוֹת הֲיֵשׁ מַשְׂכִּיל דֹּרֵשׁ אֶת ־ אֱלֹהִֽים ׃

וַיִּקְרָא שִׁמְשׁוֹן אֶל ־ יְהוָה וַיֹּאמַר אֲדֹנָי יֱהֹוִה זָכְרֵנִי נָא וְחַזְּקֵנִי נָא אַךְ הַפַּעַם הַזֶּה הָאֱלֹהִים וְאִנָּקְמָה נְקַם ־ אַחַת מִשְּׁתֵי עֵינַי מִפְּלִשְׁתִּֽים ׃

וְהִתְעַנַּג עַל ־ יְהוָה וְיִֽתֶּן ־ לְךָ מִשְׁאֲלֹת לִבֶּֽךָ ׃

לַמְנַצֵּחַ לְדָוִד מִזְמוֹר יְהוָה חֲקַרְתַּנִי וַתֵּדָֽע ׃

אַתָּה יָדַעְתָּ שִׁבְתִּי וְקוּמִי בַּנְתָּה לְרֵעִי מֵרָחֽוֹק ׃