תֵּאָלַמְנָה שִׂפְתֵי שָׁקֶר הַדֹּבְרוֹת עַל ־ צַדִּיק עָתָק בְּגַאֲוָה וָבֽוּז ׃

גֹּל אֶל ־ יְהוָה מַעֲשֶׂיךָ וְיִכֹּנוּ מַחְשְׁבֹתֶֽיךָ ׃

בָּרוּךְ הַגֶּבֶר אֲשֶׁר יִבְטַח בַּֽיהוָה וְהָיָה יְהוָה מִבְטַחֽוֹ ׃

וְהָיָה כְּעֵץ ׀ שָׁתוּל עַל ־ מַיִם וְעַל ־ יוּבַל יְשַׁלַּח שָֽׁרָשָׁיו וְלֹא ירא כִּֽי ־ יָבֹא חֹם וְהָיָה עָלֵהוּ רַֽעֲנָן וּבִשְׁנַת בַּצֹּרֶת לֹא יִדְאָג וְלֹא יָמִישׁ מֵעֲשׂוֹת פֶּֽרִי ׃

כִּֽי ־ תַעֲבֹר בַּמַּיִם אִתְּךָ ־ אָנִי וּבַנְּהָרוֹת לֹא יִשְׁטְפוּךָ כִּֽי ־ תֵלֵךְ בְּמוֹ ־ אֵשׁ לֹא תִכָּוֶה וְלֶהָבָה לֹא תִבְעַר ־ בָּֽךְ ׃

מִי ־ לִי בַשָּׁמָיִם וְעִמְּךָ לֹא ־ חָפַצְתִּי בָאָֽרֶץ ׃

אַל ־ יִתֵּן לַמּוֹט רַגְלֶךָ אַל ־ יָנוּם שֹֽׁמְרֶֽךָ ׃

לֹא אִישׁ אֵל וִֽיכַזֵּב וּבֶן ־ אָדָם וְיִתְנֶחָם הַהוּא אָמַר וְלֹא יַעֲשֶׂה וְדִבֶּר וְלֹא יְקִימֶֽנָּה ׃

שָׁאֲפוּ שׁוֹרְרַי כָּל ־ הַיּוֹם כִּֽי ־ רַבִּים לֹחֲמִים לִי מָרֽוֹם ׃

אַךְ ־ הוּא צוּרִי וִֽישׁוּעָתִי מִשְׂגַּבִּי לֹא אֶמּֽוֹט ׃

מַשְׂכִּיל עַל ־ דָּבָר יִמְצָא ־ טוֹב וּבוֹטֵחַ בַּיהוָה אַשְׁרָֽיו ׃

יֹשֵׁב בְּסֵתֶר עֶלְיוֹן בְּצֵל שַׁדַּי יִתְלוֹנָֽן ׃

אֹמַר לַֽיהוָה מַחְסִי וּמְצוּדָתִי אֱלֹהַי אֶבְטַח ־ בּֽוֹ ׃

בְּטַח בַּֽיהוָה וַעֲשֵׂה ־ טוֹב שְׁכָן ־ אֶרֶץ וּרְעֵה אֱמוּנָֽה ׃

בְּטַח אֶל ־ יְהוָה בְּכָל ־ לִבֶּךָ וְאֶל ־ בִּֽינָתְךָ אַל ־ תִּשָּׁעֵֽן ׃

בְּכָל ־ דְּרָכֶיךָ דָעֵהוּ וְהוּא יְיַשֵּׁר אֹֽרְחֹתֶֽיךָ ׃

קָרוֹב יְהוָה לְכָל ־ קֹרְאָיו לְכֹל אֲשֶׁר יִקְרָאֻהוּ בֶאֱמֶֽת ׃

יוֹם אִירָא אֲנִי אֵלֶיךָ אֶבְטָֽח ׃

הַשְׁמִיעֵנִי בַבֹּקֶר ׀ חַסְדֶּךָ כִּֽי ־ בְךָ בָטָחְתִּי הוֹדִיעֵנִי דֶּֽרֶךְ ־ זוּ אֵלֵךְ כִּֽי ־ אֵלֶיךָ נָשָׂאתִי נַפְשִֽׁי ׃

חֶרְדַּת אָדָם יִתֵּן מוֹקֵשׁ וּבוֹטֵחַ בַּיהוָה יְשֻׂגָּֽב ׃