שְׂאוּ לַשָּׁמַיִם עֵֽינֵיכֶם וְֽהַבִּיטוּ אֶל ־ הָאָרֶץ מִתַּחַת כִּֽי ־ שָׁמַיִם כֶּעָשָׁן נִמְלָחוּ וְהָאָרֶץ כַּבֶּגֶד תִּבְלֶה וְיֹשְׁבֶיהָ כְּמוֹ ־ כֵן יְמוּתוּן וִישֽׁוּעָתִי לְעוֹלָם תִּֽהְיֶה וְצִדְקָתִי לֹא תֵחָֽת ׃ ס

וְהִנֵּה אָנֹכִי הוֹלֵךְ הַיּוֹם בְּדֶרֶךְ כָּל ־ הָאָרֶץ וִידַעְתֶּם בְּכָל ־ לְבַבְכֶם וּבְכָל ־ נַפְשְׁכֶם כִּי לֹֽא ־ נָפַל דָּבָר אֶחָד מִכֹּל ׀ הַדְּבָרִים הַטּוֹבִים אֲשֶׁר דִּבֶּר יְהוָה אֱלֹהֵיכֶם עֲלֵיכֶם הַכֹּל בָּאוּ לָכֶם לֹֽא ־ נָפַל מִמֶּנּוּ דָּבָר אֶחָֽד ׃

צְרוּפָה אִמְרָתְךָ מְאֹד וְֽעַבְדְּךָ אֲהֵבָֽהּ ׃

כִּי עוֹד חָזוֹן לַמּוֹעֵד וְיָפֵחַ לַקֵּץ וְלֹא יְכַזֵּב אִם ־ יִתְמַהְמָהּ חַכֵּה ־ לוֹ כִּֽי ־ בֹא יָבֹא לֹא יְאַחֵֽר ׃

לֹֽא ־ נָפַל דָּבָר מִכֹּל הַדָּבָר הַטּוֹב אֲשֶׁר ־ דִּבֶּר יְהוָה אֶל ־ בֵּית יִשְׂרָאֵל הַכֹּל בָּֽא ׃ פ

בָּרוּךְ יְהוָה אֲשֶׁר נָתַן מְנוּחָה לְעַמּוֹ יִשְׂרָאֵל כְּכֹל אֲשֶׁר דִּבֵּר לֹֽא ־ נָפַל דָּבָר אֶחָד מִכֹּל דְּבָרוֹ הַטּוֹב אֲשֶׁר דִּבֶּר בְּיַד מֹשֶׁה עַבְדּֽוֹ ׃

לֹא אִישׁ אֵל וִֽיכַזֵּב וּבֶן ־ אָדָם וְיִתְנֶחָם הַהוּא אָמַר וְלֹא יַעֲשֶׂה וְדִבֶּר וְלֹא יְקִימֶֽנָּה ׃

מַֽלְכוּתְךָ מַלְכוּת כָּל ־ עֹֽלָמִים וּמֶֽמְשֶׁלְתְּךָ בְּכָל ־ דּוֹר וָדֽוֹר ׃

סוֹמֵךְ יְהוָה לְכָל ־ הַנֹּפְלִים וְזוֹקֵף לְכָל ־ הַכְּפוּפִֽים ׃

יְהוָה צַדִּיק בְּקִרְבָּהּ לֹא יַעֲשֶׂה עַוְלָה בַּבֹּקֶר בַּבֹּקֶר מִשְׁפָּטוֹ יִתֵּן לָאוֹר לֹא נֶעְדָּר וְלֹֽא ־ יוֹדֵעַ עַוָּל בֹּֽשֶׁת ׃

עֲצַת יְהוָה לְעוֹלָם תַּעֲמֹד מַחְשְׁבוֹת לִבּוֹ לְדֹר וָדֹֽר ׃