יִֽרְאַת יְהוָה שְֽׂנֹאת רָע גֵּאָה וְגָאוֹן ׀ וְדֶרֶךְ רָע וּפִי תַהְפֻּכוֹת שָׂנֵֽאתִי ׃

אַל ־ תְּהִי חָכָם בְּעֵינֶיךָ יְרָא אֶת ־ יְהוָה וְסוּר מֵרָֽע ׃

רִפְאוּת תְּהִי לְשָׁרֶּךָ וְשִׁקּוּי לְעַצְמוֹתֶֽיךָ ׃

אֹהֲבֵי יְהוָה שִׂנְאוּ רָע שֹׁמֵר נַפְשׁוֹת חֲסִידָיו מִיַּד רְשָׁעִים יַצִּילֵֽם ׃

פְּעָמַי הָכֵן בְּאִמְרָתֶךָ וְֽאַל ־ תַּשְׁלֶט ־ בִּי כָל ־ אָֽוֶן ׃

יְֽהוָה יִשְׁמָרְךָ מִכָּל ־ רָע יִשְׁמֹר אֶת ־ נַפְשֶֽׁךָ ׃

יְֽהוָה יִשְׁמָר ־ צֵאתְךָ וּבוֹאֶךָ מֵֽעַתָּה וְעַד ־ עוֹלָֽם ׃

וְאַתֶּם חֲשַׁבְתֶּם עָלַי רָעָה אֱלֹהִים חֲשָׁבָהּ לְטֹבָה לְמַעַן עֲשֹׂה כַּיּוֹם הַזֶּה לְהַחֲיֹת עַם ־ רָֽב ׃

שִׂנְאָה תְּעוֹרֵר מְדָנִים וְעַל כָּל ־ פְּשָׁעִים תְּכַסֶּה אַהֲבָֽה ׃

רַחֲצוּ הִזַּכּוּ הָסִירוּ רֹעַ מַעַלְלֵיכֶם מִנֶּגֶד עֵינָי חִדְלוּ הָרֵֽעַ ׃

נְצֹר לְשׁוֹנְךָ מֵרָע וּשְׂפָתֶיךָ מִדַּבֵּר מִרְמָֽה ׃

כֹּה אָמַר יְהוָה צְבָאוֹת לֵאמֹר מִשְׁפַּט אֱמֶת שְׁפֹטוּ וְחֶסֶד וְרַֽחֲמִים עֲשׂוּ אִישׁ אֶת ־ אָחִֽיו ׃

וְאַלְמָנָה וְיָתוֹם גֵּר וְעָנִי אַֽל ־ תַּעֲשֹׁקוּ וְרָעַת אִישׁ אָחִיו אַֽל ־ תַּחְשְׁבוּ בִּלְבַבְכֶֽם ׃