מָצָא אִשָּׁה מָצָא טוֹב וַיָּפֶק רָצוֹן מֵיְהוָֽה ׃

רְאֵה חַיִּים עִם ־ אִשָּׁה אֲשֶׁר ־ אָהַבְתָּ כָּל ־ יְמֵי חַיֵּי הֶבְלֶךָ אֲשֶׁר נָֽתַן ־ לְךָ תַּחַת הַשֶּׁמֶשׁ כֹּל יְמֵי הֶבְלֶךָ כִּי הוּא חֶלְקְךָ בַּֽחַיִּים וּבַעֲמָלְךָ אֲשֶׁר ־ אַתָּה עָמֵל תַּחַת הַשָּֽׁמֶשׁ ׃

¹⁵ שְׁתֵה ־ מַיִם מִבּוֹרֶךָ וְנֹזְלִים מִתּוֹךְ בְּאֵרֶֽךָ ׃

¹⁶ יָפוּצוּ מַעְיְנֹתֶיךָ חוּצָה בָּרְחֹבוֹת פַּלְגֵי ־ מָֽיִם ׃

¹⁷ יִֽהְיוּ ־ לְךָ לְבַדֶּךָ וְאֵין לְזָרִים אִתָּֽךְ ׃

¹⁸ יְהִֽי ־ מְקוֹרְךָ בָרוּךְ וּשְׂמַח מֵאֵשֶׁת נְעוּרֶֽךָ ׃

¹⁹ אַיֶּלֶת אֲהָבִים וְֽיַעֲלַת ־ חֵן דַּדֶּיהָ יְרַוֻּךָ בְכָל ־ עֵת בְּאַהֲבָתָהּ תִּשְׁגֶּה תָמִֽיד ׃

²⁰ וְלָמָּה תִשְׁגֶּה בְנִי בְזָרָה וּתְחַבֵּק חֵק נָכְרִיָּֽה ׃

עַל ־ כֵּן יַֽעֲזָב ־ אִישׁ אֶת ־ אָבִיו וְאֶת ־ אִמּוֹ וְדָבַק בְּאִשְׁתּוֹ וְהָיוּ לְבָשָׂר אֶחָֽד ׃

וְאִם רַע בְּֽעֵינֵיכֶם לַעֲבֹד אֶת ־ יְהוָה בַּחֲרוּ לָכֶם הַיּוֹם אֶת ־ מִי תַעֲבֹדוּן אִם אֶת ־ אֱלֹהִים אֲשֶׁר ־ עָבְדוּ אֲבוֹתֵיכֶם אֲשֶׁר בעבר הַנָּהָר וְאִם אֶת ־ אֱלֹהֵי הָאֱמֹרִי אֲשֶׁר אַתֶּם יֹשְׁבִים בְּאַרְצָם וְאָנֹכִי וּבֵיתִי נַעֲבֹד אֶת ־ יְהוָֽה ׃ פ