חַשְׁתִּי וְלֹא הִתְמַהְמָהְתִּי לִשְׁמֹר מִצְוֺתֶֽיךָ ׃

לֹא תִשְׁמַע אֶל ־ דִּבְרֵי הַנָּבִיא הַהוּא אוֹ אֶל ־ חוֹלֵם הַחֲלוֹם הַהוּא כִּי מְנַסֶּה יְהוָה אֱלֹֽהֵיכֶם אֶתְכֶם לָדַעַת הֲיִשְׁכֶם אֹֽהֲבִים אֶת ־ יְהוָה אֱלֹהֵיכֶם בְּכָל ־ לְבַבְכֶם וּבְכָל ־ נַפְשְׁכֶֽם ׃

בְּכָל ־ הַדֶּרֶךְ אֲשֶׁר צִוָּה יְהוָה אֱלֹהֵיכֶם אֶתְכֶם תֵּלֵכוּ לְמַעַן תִּֽחְיוּן וְטוֹב לָכֶם וְהַאֲרַכְתֶּם יָמִים בָּאָרֶץ אֲשֶׁר תִּֽירָשֽׁוּן ׃

שִׁיר הַֽמַּעֲלוֹת אַשְׁרֵי כָּל ־ יְרֵא יְהוָה הַהֹלֵךְ בִּדְרָכָֽיו ׃

אַֽל ־ תֵּט ־ יָמִין וּשְׂמֹאול הָסֵר רַגְלְךָ מֵרָֽע ׃

וַֽיהוָה הוּא ׀ הַהֹלֵךְ לְפָנֶיךָ הוּא יִהְיֶה עִמָּךְ לֹא יַרְפְּךָ וְלֹא יַֽעַזְבֶךָּ לֹא תִירָא וְלֹא תֵחָֽת ׃

פְּעָמַי הָכֵן בְּאִמְרָתֶךָ וְֽאַל ־ תַּשְׁלֶט ־ בִּי כָל ־ אָֽוֶן ׃

מֵיְהוָה מִֽצְעֲדֵי ־ גֶבֶר כּוֹנָנוּ וְדַרְכּוֹ יֶחְפָּֽץ ׃

וְאִם רַע בְּֽעֵינֵיכֶם לַעֲבֹד אֶת ־ יְהוָה בַּחֲרוּ לָכֶם הַיּוֹם אֶת ־ מִי תַעֲבֹדוּן אִם אֶת ־ אֱלֹהִים אֲשֶׁר ־ עָבְדוּ אֲבוֹתֵיכֶם אֲשֶׁר בעבר הַנָּהָר וְאִם אֶת ־ אֱלֹהֵי הָאֱמֹרִי אֲשֶׁר אַתֶּם יֹשְׁבִים בְּאַרְצָם וְאָנֹכִי וּבֵיתִי נַעֲבֹד אֶת ־ יְהוָֽה ׃ פ