לֹא תִּֿנְאָֽף ׃ ס

יְהִֽי ־ מְקוֹרְךָ בָרוּךְ וּשְׂמַח מֵאֵשֶׁת נְעוּרֶֽךָ ׃

אַיֶּלֶת אֲהָבִים וְֽיַעֲלַת ־ חֵן דַּדֶּיהָ יְרַוֻּךָ בְכָל ־ עֵת בְּאַהֲבָתָהּ תִּשְׁגֶּה תָמִֽיד ׃

⁶ אִישׁ אִישׁ אֶל ־ כָּל ־ שְׁאֵר בְּשָׂרוֹ לֹא תִקְרְבוּ לְגַלּוֹת עֶרְוָה אֲנִי יְהוָֽה ׃ ס

⁷ עֶרְוַת אָבִיךָ וְעֶרְוַת אִמְּךָ לֹא תְגַלֵּה אִמְּךָ הִוא לֹא תְגַלֶּה עֶרְוָתָֽהּ ׃ ס

⁸ עֶרְוַת אֵֽשֶׁת ־ אָבִיךָ לֹא תְגַלֵּה עֶרְוַת אָבִיךָ הִֽוא ׃ ס

⁹ עֶרְוַת אֲחֽוֹתְךָ בַת ־ אָבִיךָ אוֹ בַת ־ אִמֶּךָ מוֹלֶדֶת בַּיִת אוֹ מוֹלֶדֶת חוּץ לֹא תְגַלֶּה עֶרְוָתָֽן ׃ ס

¹⁰ עֶרְוַת בַּת ־ בִּנְךָ אוֹ בַֽת ־ בִּתְּךָ לֹא תְגַלֶּה עֶרְוָתָן כִּי עֶרְוָתְךָ הֵֽנָּה ׃ ס

¹¹ עֶרְוַת בַּת ־ אֵשֶׁת אָבִיךָ מוֹלֶדֶת אָבִיךָ אֲחוֹתְךָ הִוא לֹא תְגַלֶּה עֶרְוָתָֽהּ ׃ ס

¹² עֶרְוַת אֲחוֹת ־ אָבִיךָ לֹא תְגַלֵּה שְׁאֵר אָבִיךָ הִֽוא ׃ ס

¹³ עֶרְוַת אֲחֽוֹת ־ אִמְּךָ לֹא תְגַלֵּה כִּֽי ־ שְׁאֵר אִמְּךָ הִֽוא ׃ ס

¹⁴ עֶרְוַת אֲחִֽי ־ אָבִיךָ לֹא תְגַלֵּה אֶל ־ אִשְׁתּוֹ לֹא תִקְרָב דֹּדָֽתְךָ הִֽוא ׃ ס

¹⁵ עֶרְוַת כַּלָּֽתְךָ לֹא תְגַלֵּה אֵשֶׁת בִּנְךָ הִוא לֹא תְגַלֶּה עֶרְוָתָֽהּ ׃ ס

¹⁶ עֶרְוַת אֵֽשֶׁת ־ אָחִיךָ לֹא תְגַלֵּה עֶרְוַת אָחִיךָ הִֽוא ׃ ס

¹⁷ עֶרְוַת אִשָּׁה וּבִתָּהּ לֹא תְגַלֵּה אֶֽת ־ בַּת ־ בְּנָהּ וְאֶת ־ בַּת ־ בִּתָּהּ לֹא תִקַּח לְגַלּוֹת עֶרְוָתָהּ שַׁאֲרָה הֵנָּה זִמָּה הִֽוא

¹⁸ וְאִשָּׁה אֶל ־ אֲחֹתָהּ לֹא תִקָּח לִצְרֹר לְגַלּוֹת עֶרְוָתָהּ עָלֶיהָ בְּחַיֶּֽיהָ ׃

¹⁹ וְאֶל ־ אִשָּׁה בְּנִדַּת טֻמְאָתָהּ לֹא תִקְרַב לְגַלּוֹת עֶרְוָתָֽהּ ׃

²⁰ וְאֶל ־ אֵשֶׁת עֲמִֽיתְךָ לֹא ־ תִתֵּן שְׁכָבְתְּךָ לְזָרַע לְטָמְאָה ־ בָֽהּ ׃

²¹ וּמִֽזַּרְעֲךָ לֹא ־ תִתֵּן לְהַעֲבִיר לַמֹּלֶךְ וְלֹא תְחַלֵּל אֶת ־ שֵׁם אֱלֹהֶיךָ אֲנִי יְהוָֽה ׃

²² וְאֶת ־ זָכָר לֹא תִשְׁכַּב מִשְׁכְּבֵי אִשָּׁה תּוֹעֵבָה הִֽוא ׃

²³ וּבְכָל ־ בְּהֵמָה לֹא ־ תִתֵּן שְׁכָבְתְּךָ לְטָמְאָה ־ בָהּ וְאִשָּׁה לֹֽא ־ תַעֲמֹד לִפְנֵי בְהֵמָה לְרִבְעָהּ תֶּבֶל הֽוּא ׃

וְלֹא ־ אֶחָד עָשָׂה וּשְׁאָר רוּחַ לוֹ וּמָה הָֽאֶחָד מְבַקֵּשׁ זֶרַע אֱלֹהִים וְנִשְׁמַרְתֶּם בְּרוּחֲכֶם וּבְאֵשֶׁת נְעוּרֶיךָ אַל ־ יִבְגֹּֽד ׃

וַיִּבְרָא אֱלֹהִים ׀ אֶת ־ הָֽאָדָם בְּצַלְמוֹ בְּצֶלֶם אֱלֹהִים בָּרָא אֹתוֹ זָכָר וּנְקֵבָה בָּרָא אֹתָֽם ׃

וַיְבָרֶךְ אֹתָם אֱלֹהִים וַיֹּאמֶר לָהֶם אֱלֹהִים פְּרוּ וּרְבוּ וּמִלְאוּ אֶת ־ הָאָרֶץ וְכִבְשֻׁהָ וּרְדוּ בִּדְגַת הַיָּם וּבְעוֹף הַשָּׁמַיִם וּבְכָל ־ חַיָּה הָֽרֹמֶשֶׂת עַל ־ הָאָֽרֶץ ׃

עַל ־ כֵּן יַֽעֲזָב ־ אִישׁ אֶת ־ אָבִיו וְאֶת ־ אִמּוֹ וְדָבַק בְּאִשְׁתּוֹ וְהָיוּ לְבָשָׂר אֶחָֽד ׃