Mateus 14

Yesu nowaalhiha attu maelufu nthanu

13 Yesu eeweke mwaha u Nayohana, nkaathama vavawo vakittu vawo nkayaawelhacha nkalhavani, nkaarwa vakittu vo wiivitha yeekha awe. Attu yeeweke, nkayaathama mmawannyaya nkayanttwara wo mieto. 14 Yesu akhuruweke nkalhavani, nkoona nlhoko mulhupalhe wa attu, nrima awe nkawaakelhiya ikiriri, nkaalhamiha areta mareta aya.

15 Vaari aya uchechilho, owiittucha awe nkayanrweelha ni umwiirelha, "Uheelha vano, ni va vakittu va vauthakoni. Paahi etu mwaalheheke attu wiira athamache ahokolhieke mmawani athumeke yolhia." 16 Yesu nkaakhulha, "Khavanooria waahiya chiicho, mwaavaheke yolhia mwaattiva!" 17 Ayo nkayamwaakhulha, "Khanirina yolhia, nirina mikatte mithanu ni ihopa pilhi." 18 Yesu nkeera, "Nkiwiihereke vaa." 19 Nkaalhehera attu akhalhe vathi mmanyashini, nkaakusha mikatte mithanu chilhe ni ihopa pilhi chilhe, nkaaweha wiirimu, nkalhapelhelha ibarakha, nkaamianihacha nkaavaha owiittucha awe aakawelhe attu. 20 Attu onkhaye nkaalhia ni uwona. Yamalheke owiittucha ahokhupa mikatte chaahanlhe, nkaachariha makaya khumi ni melhi. 21 Attu aalhilhie aari manyaalhopwana maelufu nthanu, wo uhaalhakelha manyaathiyana ni achishaana.