Namatayo 9

Mwalhi a nholhelhi ni nthiyana ammanre ikuwo Yesu

18 Yesu vaari awe olhumachaka yayo, nholhelhi mmoka a Ayahudi nkaawa, nkankhoromelha ni wulhumacha eeraka, "Mwalhi aka hokhwa naanano vaa, nansho chonte nngwe mwamweeshere moono, ni uyo noolhama." 19 Yesu ni owiittucha awe nkayaathama nkayanttwara.

20 Opani amoka, aari awereiyaka ireta yo ukhuma iphome, nchorochoro iyaakha khumi ni pilhi, ahonttwara Yesu vatulhi vawe, nkaavara ikuwo awe. 21 Aapangilhe chiicho opuwelhaka munrimani eeraka wiira, "Kavaraka tu ikuwo awe kinoolhama." 22 Yesu nkaarukunuwa nkoona, nkeera, "Mwaamwanaka, wiilhipiheke nrima ao uhoolhamiha!" Opani ayo nkayaalhama yeyo isaa iyo.

23 Yamalheke Yesu nkaakelha mpaani mwa yoyo nholhelhi uyo. Oneekeru attu aamopa mpeta ni attu onlhacha, 24 nkeera, "Nthamache va attu onkhaye! Mwalhi ulha kanakhwa, howiraka urupa!" Attu aamwiwilhe ayo nkanthiacha. 25 Paahi etu attu athamekeru, Yesu ahokelha mpaani waarumpe awe mwalhi, nkammara moono, ni uyo nkeemelha. 26 Nenno nlhove nno nkanaawanelha ilhapo yonkhaye.