Lucas 24

Yesu jililangi kwaka banafunzi abeli

13 Lisoba alelale, banafunzi abeli baka Yesu babia ajenda kukijiji simu se bikikema Emau, utali waki kilumita komomi na moja kuhuma ku Yelusalemu, 14 Babia alongalee haga goti gagapiti. 15 Pababia alongalane nuku pwaganii, Yesu mweni jatenda kwaapitii, nukujenda pamu nabombi. 16 Bummbona kwa mihu, lakini ngase bummanyiki. 17 Yesu jaalalukiya, "Mndongalane kyane koni nzendanela?"

Nabombi bajeema nuu, na pamihu jabu pabonikana nu usungu. 18 Jumu kati jabu, jobunkemika Kileopa, andalukiya, "Boo, weapa ndi kajika jaku gu ngeni uku Yelusalemu, ngasegumanyiki majambu gagapiti mu masoba ga heno haga?"

19 Najombi jaalalukya, "Majambu bole?"

Bumpwagila, "Majambu gagumpata Yesu juku Nazaleti. Mundu we hoju jabii Mlota waka Sapanga junu makili gukubola nukuhenga mahengu gaki, palongi jaka Sapanga na palongi ja bandu boti. 20 Aka akolongu ba agolu na aka kilongosi bitu bumpelika kwa akolongu buku Loma ili antemumula kuwa, nabombi bummbambaliya pu nsalaba. 21 Lakini twepani twabia tunhobale jombi ndi jaagombula bandu buku Izilaeli. Nalelenu lisoba la tatu tumbuka majambu ge haga pagapitila. 22 Kabee, aka mbomba bangi ba kwitu batenda kutusangasa. Pulukela ngani bajenda kulitenge, 23 lakini ngase bijiketanii nhyega jaka Yesu. Bakelubuka nu kupwaga, baapitii atumi bu kunani kwaka Sapanga, atumi be bapwaga Yesu jubii mwome. 24 Ndipala bandu bangi ajitu bajenda kulitenge, nabombi bukuketannya ngati ebapwaga aka mbomba bala, lakini ngase bumbweni Yesu."

25 Ndipala Yesu jaapwagila, "Mbona mwaang’ang’a hela! Na mwanganya nhobale mbolimboli gabapwaaga alota baka Sapanga! 26 Boo, ngasekwapalika Kilisitu jung’alika ngati hela, na moni katai jujingila mu ulumbi wake?" 27 Yesu jaayekulia hotuhotu majambu goti gagundangii jombi mu Maandiku ga Sapi, tumbuka mu itabu yejuandiki Musa na mu maandiku gaka alota boha baka Sapanga.

28 Nabombi pabahika pambipi ni kijiji sela sebabia bakajenda, Yesu jatenda ngati kupetana, 29 lakini bombi buhingamakiya ngamaa juhigaliya nabu, koni bakapwaga, "Tama pamba na twe, ndaba sajenu pakamihi na lwii lutenda kuhika." Ndienu jajingala nkati nu kutama nabu. 30 Yesu pajabii jutami nabu pamu na kula nabu posu, jajukua libumunda, ansengula Sapanga, jamega na kapeke ajaki. 31 Apalapa mihu gabu gatenda kuogoka nabombi bumanya jombi, najombi jahoba ngase bumbona kabee. 32 Ndipala, bapwaganiya, "Boo, mioju jito ngasejutujosiki pajabii jutupwagi mwiindela nu kutusimuli Maandiku ga sapi?"

33 Babokaniya apalapa, bakelubuka ku Yelusalemu, kokuje baaketaniya banafunzi bala komi na jumu na bangi bababii pamwa nabu aketangini. 34 Bapwaga, "Sakaka Bambu juyokiki! Ampiti Simoni!"

35 Ndipala bandu abeli bala baapwagila ajabu gagapiti mwindela, na ebummanya Yesu pajamega libumunda.