Lucas 24

Kujenda ku Emau

13 Lichobha lelalela, bhabhulwa bhabhele bhaka Yesu bhakabhi bhajenda ku chijiji chimu chekilowakeka Emau, chechikabhi utali wa kilometa komi na moja kuhuma ku Yelusalemu. 14 Bhakabhi bhalongale panani ja mambu ghokapi ghaghapitalile. 15 Pabhakabhi bhalongale na kulaluwana, Yesu mweni akabhaheghali pambipi na kulongana nabhu. 16 Bhakumbweni nambu ngachebhumanye. 17 Yesu akabhalalukile, "Bho, ndongale kiki koni njenda?"

Na bhombi bhakajemiki na kutumbala chinunu, koni bhakalangiya pamihu jabhu kubha bhabhi na huzuni. 18 Jumu wabhu pachilanda ja bhandu bhanihabha, joalowakika Kileopa, akamuyangike, "Bho, wehapa le ungeni kanjika jaku ku Yelusalemu, wangakumanya mambu ghaghapitali konihoku machobha ghane?"

19 Jombi akabhalalukile, "Mambu bhole?"

Bhombi bhakamuyangiki, "Mambu ghaghumpitali Yesu wa ku Nazaleti. Mundu hoju akabhi mlota waka Chapanga joakabhi na uwezu wa kuhenga na kubhola palongi jaka Chapanga na palongi ja bhandu bhokapi. 20 Bhapenganyambiku bhakolongwa na bhatawala bhitu bhakumbohiki nahuli atemuliwa kupotela, na bhombi bhakunhwambiki punsalaba. 21 Tepani tukahobhali kubha jombi nde joabhakombulaje bhandu bha Izilaeli. Nambu lalenu nde lichobha la katatu kutumbu mambu ghanihagha paghahengakike. 22 Bhelabhela akambomba bhangi kuhuma mulipogha litu bhatehi kutukangacha. Bhakapiti kulitengeli lukela pachibhombu, 23 nambu ngachebhakajiweni hyegha jaki. Bhela bhakakelawiki na kutupwaghi kubha bhakapitaliwi na bhatumika bha kunani kwaka Chapanga na kubhapwaghi kubha Yesu abhi mwome. 24 Bhakumu bhitu bhakapiti kulitengeli, na kughahimani mambu ghokapi chakaka ngati mobhapwaghila akambomba bhala, nambu jombi ngachebhumbwene."

25 Bhela Yesu akabhapwaghile, "Bho, mbona mbi mwang’ang’a bhenibhela, na mitima jinu jinonwopi kuhobhalela malobhi ghokapi ghaghalongaliki na bhalota bhaka Chapanga? 26 Bho, ngachekumpaliki Kristo kung’ahakika, na bhela kujingi mu ulumbalilu waki?" 27 Akabhapwaghi mambu ghokapi ghaghumpalika jombi mu Malembu Mahuhu ghokapi, kutumbu itabu yokapi yaka Musa na kujendale mu itabhu yokapi ya bhalota bhokapi bhaka Chapanga.

28 Pabhakaheghali pambipi na chijiji chebhapita chela, Yesu akalengiki kubha ngati ajendale na mwanja, 29 nambu bhombi bhakumpembali namaa, bhakapwaghaje, "Utama papamu na tepani, maghambu kutenda kupilila, na ikilu kuheghalela." Bhela akapiti na kutama papamu nabhu. 30 Paakatami kula chilebhi papamu nabhu, akatoliki libumunda, akalipengalili, akalihekiti, na kubhapekeha. 31 Palapala mihu ghabhu ghakahoghuliwi, bhakummanye, nambu jombi akahobhiki pamihu jabhu. 32 Bhela bhakapwaghanile, "Bho, mitima jitu le ngachejibhelala mkati jitu paakabhi atuyekulila Malembu Mahuhu kwindela kola?"

33 Palapala bhakabhokiki na kukelabhuka ku Yelusalemu. Konikola bhakabhaketani mitumi komi na jumu bhala bhalibhongini papamu, bhakabya na bhandu bhangi bhabhakabhili papamu nabhu, 34 bhakapwaghaje, "Chakaka Bambo ayokike, na akumpitali Simoni."

35 Bhela bhabhulwa bhabheli bhala bhakabhalandi mambu ghala ghaghapatiki mwindela, na ntundu mobhakummanyi paakabhi aheketa libumunda.