Luka 8

Mwali waka Yairo na mbomba jumu bhalamiswa

40 Yesu paakakelawiki upambala ghongi wa nhwanga, lipogha la bhandu bhakunjopali kwa chiheku, maghambu bhokapi bhundendalya jombi. 41 Panihapa akahikiki mundu jumu joalowakika Yailo, joakabhi nkolongwa wa nyumba ja kuhimangani Bhayahude, akahikiki na kulihabhu pambipi ja magholu ghaka Yesu, akundobha ajenda kunyumba jaki, 42 ndandi mwali waki wa kanjika, joakabhi na hyaka komi na ibheli, akabhi pambipi kupotela.

Yesu paajendikaje, lipogha la bhandu lakunhinyiki ipambala yokapi. 43 Pa chilanda jabhu kukabhi na mbomba jumu joakang’ahakiki na chitamu cha kupita mwahi kwa hyaka komi na ibheli, papamu na kutumi hindu yaki yokapi kwa akasing’anga, nambu nga jumu joaweziki kundamiha. 44 Mbomba hoju akanjengali Yesu cha kunyuma na kukamu nkungilu wa ingobhu jaki. Palapala chitamu chaki cha kupita mwahi chakalamike. 45 Yesu akalalukile, "Bho, nde nane joangamwile?"

Bhandu bhokapi bhakakaniki, Petulu akapwaghike, "Bambo, lipogha la bhandu likuyongalwiti na kukuhinya."

46 Nambu Yesu akapwaghike, "Kubhi mundu joangamwile, ndandi niliweni makili ghamokite." 47 Mbomba jola paamanyiti kubha ngaawezi kulihiya, akahikiki koni abhaghaja kwa choghohi na kulileke palongi jaka Yesu. Panihapa akundandi Yesu palongi ja bhandu bhokapi bhabhakabhi panipala ndandi ja kunkamu Yesu na ntundu moawezi kulamishwa palapala. 48 Yesu akumpwaghi mwali jola, "Kamwali, uhobhalelu waku ukulamihe. Ujenda kwa lukwale."

49 Yesu paakabhi ajendale kupwagha, mbolu akahikiki kuhuma kunyumba jaka Yairo. Na kumpwaghi Yairo, "Mwali waku apotile. Ngawijendale kung’aha Mbola."

50 Nambu Yesu paakajowini malobhi ghanihagha, akumpwaghi Yairo, "Ngawijoghopa, uhobhalya pela, na mwali waku analamiswaje."

51 Yesu paakahikiki kunyumba jaka Yairo, ngacheanjetakali mundu jokapi kujingi naku munyumba, nambu Petulu na Yohana na Yakobo na mabhu na atati bhaka mwali joapotili jola. 52 Bhandu bhokapi bhakabhi bhundelela na kuombuleza kwa ndandi ja kupotela kwaka mwana. Nambu Yesu akabhapwaghile, "Ngamwilela, maghambu mwana ngacheapotile, nambu aghochili lughonu pela!"

53 Bhokapi bhakundongimi Yesu, maghambu bhakamanyiki kubha mwali apotile. 54 Nambu Yesu akamkamwi chibhoku na kundoha, "Kamwali, jumukaje!" 55 Mwali joakapotili jola womi waki ukankelabhukile, na palapala akajemiki. Na Yesu akabhalaghalakili bhumpekya mwali chilebhi. 56 Bhabheleka bhaki bhakakangichi namaa, nambu Yesu akabhalaghalaki ngabhumpwaghi mundu ghaghahengakike.