Mateus 8

Yesu abhalamiha bhandu bhabheli bhabhabhi na majobhi

28 Yesu paakahikiki ku inchi ja Bhagelasi kwihi ja nhwanga, akahimangini na bhandu bhabheli bhabhabhi na majobhi. Bhandu bhanihabha bhatamika kumatengeli na bhakabhi bhakujoghupeka, na ngacheakabhi mundu joawezikaye kupeta indela jenijela. 29 Bhombi bhakatumbwi kujamalila, bhakapwaghaje, "Bho, upala kututenda kiki tepanu, Yesu, wa Mwana waka Chapanga? Bho, uhikiki kutung’aha mangani ja chikahi chake?"

30 Pambipi na pandu pala kukabhi na lipogha likolongwa la magholobhi bhakadimaye. 31 Henu majobhi ghala ghakundobhiki Yesu ghakapwagha, "Ngati utubhenga, utulekakyaje tukajingala mu magholobhi ghala."

32 Yesu akaghapwaghile, "Njendaje." Palapala majobhi ghala ghakabhapitiki bhandu bhala, na kughajingila magholobhi. Lipogha lokapi la magholobhi lakaheli palikemba likolongwa, lakajibhili munhwanga, na magholobhi ghokapi ghakapotile.

33 Bhadima bha magholobhi bhala bhakakembili, kujenda kumbwane. Konihoku bhakabhapwaghi bhandu mambu ghokapi ghaghapitalile, na mambu ghaghapitalile kwa bhandu bhala bhabhakabhili na majobhi. 34 Bhandu bhokapi bha muchi ghola bhakapiti kuhimangana na Yesu, na pabhakumbweni, bhakundobhiki abhokaje pa inchi jabhu.