Mateus 8

Yesu andamiha mtumika waka Nkolongwa wa Kiloma

5 Yesu paakajingi kumbwane ku Kapelenaumu, nkolongwa jumu wa linjolinjoli wa ku Loma akanjendili, na kundobha anjangatyaje, 6 akapwaghaje, "Bambo, mtumika wangu aghoni kunyumba, mtamwa wa kutenguka, na alwala namaa."

7 Yesu akampwaghile, "Ananhika kundamiha."

8 Nambu linjolinjoli nkolongwa jola akamuyangiki, "Bambo, nepani ngachembalika wehapa ujingala munyumba jangu. Nambu upwagha lilobhi pena, na mtumika wangu anaalamaje. 9 Maghambu nepani nanatu nde mundu nemekakiki pahi ja ujemalelu wa bhangi, mi na manjolinjoli pahi jangu. Numpwaghila jumu, ‘Ujendaje!’ Na jombi ajenda, na jongi, ‘Uhikaje!’ Na jombi ahika, na muhengalihengu wangu, ‘Tenda chindu chenjenu,’ najombi atenda."

10 Yesu paakajowini malobhi ghanihagha, akakangichi namaa, akabhapwaghi bhandu bhabhakunjengalile, "Chakaka numpwaghila, ngachenabhali kumbona mundu jokapi mu Izilaeli, joabhi na uhobhalelu ukolongwa ngati ghongone. 11 Henu numpwaghila kubha bhandu bhamaheli anabhahikaje kuhuma kolipita lyobha na kolijibhi lyobha, na bhombi anabhatama pa uwangalalu wa chilebhe papamu na Ibulahimu, Isaka, na Yakobo mu Ukolongwa wa kunani kumahunde. 12 Nambu bhala bhabhakabhi bhapalakika kubha mu Ukolongwa ghola anabhalekalikaje mu lwihi lwa kunja, konihoku anakubya kulela na kuhyagha minu." 13 Yesu akampwaghi nkolongwa wa manjolinjoli wa ku Loma jola, "Ujendaje kunyumba jaku, na kubyaji ngati mouhobhalile."

Mtumika waka nkolongwa wa manjolinjoli jola akalamiki lisaa lelalela.