João 8

Mwikeghe jwankamwii mungongola

1 Pughajhomokila gheniya, Yecho ajhakujhenda ku Kitombe cha ku Micheitune. 2 Kilabho jhake putiputi ajhakujhenda kabhele pa Nyumba jha Chapanga. Bhando bhoha bhajhakuntindila Yecho, na jwenio ajhakutama pahe na kutumbuu kwabhola. 3 Bhahe, bhabhola bha Malaghalikilo na Mapwalichayo bhajhakunnetela mwikeghe jhumo jwankamwilwe akihenga ngongola. Na kunyemeka palonge jhabhe. 4 Peniya, bhajhakunnobholela Yecho, "Mmola, mwikeghe jhonjo tunkamwii akihenga ngongola. 5 Mulilaghalikilo lito, Mucha akatulaghalikii naha, mwikeghe ngita jhonjo akong’ondwe maghanga ade ahweghe. Ngohe mwenga milonge bhole?" 6 Bhalongila naha bhanyonje Yecho bhabhehe na kihokola cha kuntakalila. Nambo Yecho ajhakulita, na kutumbuu kujhandika pahe kwa lukonje lwake.

7 Pubhajhendelila kunkonya, Yecho ajhakujhinuka na kwalobholela, "Mundo jhojhoha jwangabhehe na uhakaho pakate jhino atumbule kunkong’onda lighanga." 8 Peniya Yecho ajhakulita kabhele na kujhandika pahe. 9 Bhando bhala pubhajhohina malobhe gheniya, bhajhakutumbu kupechengana jhumojhumo, bhatumbwila ighogholo kubhoka. Ajhakuhighalika Yecho na mwikeghe jhola ajhemite papa. 10 Yecho pajhinuka, ajhakunkonya mwikeghe jhola, "Bho majhe, bhando bhibhakamwila bhala bhabhii kojhe? Bho, abhii jhe hilu mundo jhumo jwahadabwile?"

11 Mwikeghe jhola ajhakujhanguu, "Bhambo, abhii jhe mundo jwahadabwile."

Yecho ajhakunnobholela, "Nenga helahela ninhadabu ndeka. Nnyende nambo nkotoka kuhenga kabhele uhakaho."