Lucas 1

Kubhelukwa kwa Yecho kulongelwa

26 Pamwehe gwa chita gwa ndumbo jhake Elizabete, Chapanga ajhakuntuma ntumiche gwake jwa kunane jwankemitwa Gabuliele ajhende kubomane jha ku Nachalete jhibhii ku kilambo chuku Galilaya. 27 Kwa nchikana jhumo jwangakongana na munalome jwakemitwa Maliya, jwenio apalwa kutolelwa na mundo jhumo liina lyake Uchupo, jwahumii mulukolo lwa Daude. 28 Bhahe, ntumiche jwa kunane kwa Bhambo Chapanga jhola ajhakuhika kwa Maliya na kunyambucha, "Mwenga jhunangiwe umbone na Chapanga na antwelii mota hake!"

29 Papalapala Maliya pajhohina malobhe gheniya, ajhakuhechuka hake na ahololila chakumwojho, nhwalo gwa nike anyambwiche naha? 30 Ntumiche jwa kunane kwa Chapanga, ajhakunyanguu, "Maliya nkotoka kujhoghopa, Chapanga anangiye umbone gwake. 31 Mwenga nanng’egha ndumbo, na kupapa mwana munalome na mabhene namutina liina lyake Yecho. 32 Jwenio nabhaha nkolongwa, hote nakemwa Mwana jwa Chapanga, na Bhambo Chapanga chantenda kubhehe munahota nkolongwa, ngita chabhii munahota nkolongwa hoko mundo Daude. 33 Hote jwenio nabhaha ndi munahota nkolongwa jwa kibheleko cha Yakobu kwa machiko ghoha, na unahota nkolongwa gwake ghangapeta!"

34 Bhahe, Maliya ajhakunobholela ntumiche jwa Chapanga jhola, "Ghenagha naghatendeka bhole, na nenga ninakongana jhe na munalome?"

35 Ntumiche jwa kunane kwa Chapanga ajhakunyanguu, "Uhuke gwa Chapanga nahulukiya panane jhino, na uhotolo gwa Chapanga Nkolongwa naghuyekelela. Nhwalo Mwana jwenio jwapalwa kubhelukwa, nakemwa mwana jwa Jwanyahinyahi, Mwana jwa Chapanga. 36 Dola nnongo gwino Elizabete abhii na ndumbo mughogholo gwake, na ngohe ndumbo jhake itamii mu mwehe gwa chita, jwenio jwamanyikina na bhando ntonga. 37 Nhwalo kibhii ndeka chikilimba kwa Chapanga."

38 Maliya ngalongila, "Nanjino natumiche jwa Bhambo, nijhopa undendele ngita chimulonge." Peniya ntumiche jhola ajhakukibhokela.