Luka 8

Nchikana jwa Jailo na mwikeghe jhumo bhilamichwa

40 Bhahe, Yecho pabhujhita kabhele kwiye jha lilabha, ajhakulikolela lilongo lya bhando lijhakumpokela kwa ilulo, kongo bhatehila kunnendela. 41 Bhahe, ajhakuhika kilongoche jhumo jwa nyumba jha kukonganikii Akayahude, liina lyake Jailu, ajhakutama makilikite palonge jha Yecho na kumpembelekeya ajhende kajhake. 42 Nhwalo nchikana gwake jwakanjika, jwakibha na yaka kome na mibhele, atehila kulwalwa tepekatepeka abhandikila kuwegha.

Peniya Yecho pajhahwila kajha kwa Jailo, lilongo lya bhando lijhakuhindamana kwenio. 43 Bhahe, pakibha na mwikeghe jhumo pakate jha lilongo lela, mwikeghe jwenio alwalita ulwalo gwa pihe kwa yaka kome na mibhele. Kabhele akataghine ilebhe yake yoha kwa akaghanga, nambo abhii jhe jwakahotwii kunamicha. 44 Mwikeghe jwenio ajhakunyendela Yecho cha kuhyeto na kupapaha lilombolo lya ngobho jhake. Papalapala ulwalo gwake gwa pihe, ajhakulama. 45 Yecho ajhakwakonya, "Bho, ghane jwambapihe?"

Bhando bhoha pubhakanita, Petile ajhakulonge, "Bhambo, lilongo lya bhando bhubhahindamine na bhikanganakangana!"

46 Nambo Yecho ajhakulonge, "Abhii mundo jwambapapihe, nikijhoha likakala lyango imokite." 47 Peniya mwikeghe jhola palepelila kujhendelela kujhobha, ajhakukilaha kongo atehila kulendema, ajhakutama makilikite palonge jha Yecho. Ajhakunnobholela pa bhando bhoha, nhwalo ghundumite kumpapaha Yecho na chinamichwe papa. 48 Yecho ajhakunnobholela, "Nchikana gwango, kihobholelo chino kinamiche, nnyende kwa uteeke."

49 Yecho pajhendelila kulonge, ajhakuhika ntumiche jhumo kuhumii kajha kwa Jailu, ajhakunobholela Jailu, "Nchikana jwino ajhomwike, nneke kujhendelela kuntotoha Mmola."

50 Nambo pajhomwila Yecho gheniya, ajhakunnobholela Jailo, "Nkotoka kujhoghopa, uhobholele tugha, nchikana jwino nalama."

51 Pahikita pakajha pa Jailo, Yecho ajhakuhibhilikiya mundo jhonge kujhingila nkate nga Petile na Yohane na Yakobu pamonga na tate na majhe jwa nchikana jhola. 52 Bhando bhoha bhakibha bhalelita malelo gha nchikana jwenio, nambo Yecho ajhakwalobholela, "Nkotoka kulela, nchikana ahwii ndeka, abhii mugholoka tugha!"

53 Nambo bhene bhajhakunheka Yecho, nhwalo bhakamanye nchikana jhola ajhomwike. 54 Bhahe, Yecho ajhakukamula lubhoko na kunkema, "Mwe mwana, jhimuka!" 55 Ughome gwake ujhakumujhila kabhele, papalapala ajhakujhimuka. Ndi Yecho ajhakwalobholela bhankupile chakulyegha. 56 Tate na majhe gwa nchikana jhola bhajhakuhechuka hake, nambo Yecho ajhakwakanikiya bhakotoka kunnobholela mundo jhojhoha ilebhe yoha itendika peniya.