Mateus 26

Nginyika jha kunkoma Yecho

1 Yecho pajhomolila kulonge malobhe gheniya ghoha, ajhakwalobholela bhabholwa bhake, 2 "Umanyite ghahighalike machiko mabhele kubhehe na unyagho gwa Pachaka, Mwana gwa Mundo najhambilwa na kubhambwa pachalaba."

3 Machiko gheniya, akapiya matambiko bhakolo na akanahota bhajhakutama pa Bwalo jha Kayafa jwakibha nkolo jwa mpiya litambiko. 4 Na bhene bhajhakulonge nginyika jha kuchenjela jha kunkamuu Yecho bhankome. 5 "Nambo bhajhakulonge likotoka kuhengeka machiko gha unyagho gwa Pachaka, kuhoto kubhehe na bhulo pakate jha bhando."

Yecho ipakwa mahuta

6 Yecho pakibha ku Betaniya, kajha kwa Simone, helahela akemitwa Simone malohe, 7 Mwikeghe jhumo ajhakunhikilila Yecho na chupa jhitengenichwe kwa lighanga lya alabachita jhikibha na mahuta ghighachuluchwa kwa mbijha yamahele. Ajhakunhikilila Yecho pakachangwale palila na ajhakunyitila mahuta gheniya Yecho pamuto. 8 Bhabholwa bhake Yecho pubhalolita gheniya bhajhakuhyoma na kulonge, "Nhwalo gwa nike ajhitana ilebhe ngita hengeno? 9 Mahuta ghanga ghighanungulili petelele ghahoto kuchuluchwa kwa feza ya madine twe na gheniya ngaghahotwi kwabhaghanichila akahocho!"

10 Yecho akamanye chibhawachila, ajhakwalobholela, "Nhwalo gwa nike mung’aha mwikeghe jhonjo? Jwenio andendile kilebhe chambone hake nenga. 11 Nhwalo nantama na akahocho machiko ghoha, nambo nenga namejhe na mangota machiko ghoha. 12 Mwikeghe jhonjo annyitii mahuta gha petelele kwa nhwalo gwa kulenganikiya yegha jhango kwa kuchikwa. 13 Ninobholela chakaka, popoha pannema Lilobhe lya Mbone nalitangachwa, kilebhe chateii majhe jhola nakilongelwa na kukombokwa jwenio."

Yuda ijhekete kunyambila Yecho

14 Peniya Yuda Ichikaliyote, jhumo pakate jha bhabholwa bhala kome na bhabhele bha Yecho, ajhakujhenda kwa akapiya matambiko bhakolo, 15 ajhakwalobholela, "Bho, nanyambulila nike anda ninyambii Yecho mu mabhoko gwino?" Bhahe, bhajhakumalangila ipande makome matato gwa feza, 16 na kuhumii papa Yuda ajhakutumbuu kupalaha ndela jha kunnyambila Yecho.

Yecho ilyegha Pachaka na bhabholwa bhake

17 Lichiko lya kutumbula kwa unyagho gwa mabumunda ghangalekela ngedule, bhabholwa bhake bhajhakunyendelela Yecho na kunkonya, "Bho, mipala kojhe tukalenganikiye chakulya cha Pachaka?"

18 Na jwenio ajhakwajhanguu, "Nnyendengane ku muche gwa likambako limo na mukannobholele. ‘Mmola alonge, lichiko lyango libhandikile. Kwino nenga na bhabholwa bhango natulya Pachaka pamonga kajhino.’ "

19 Na bhene bhabholwa bhajhakuhenga ngita chabhalaghalikiye Yecho, bhajhakulenganikiya chakulye Pachaka.

20 Pihikila kimiye, Yecho ajhakutama pakulyegha pamonga na bhabholwa bhake bhoha kome na bhabhele. 21 Pubhakibha mukulyegha, Yecho ajhakwalobholela, "Ninnobholela chakaka, jhumo pakate jhino nandenda kunyambila."

22 Bhahe, bhabholwa bhake bhajhakubhehe ngolongondi hake ku mwojho, bhajhakutumbuu kunkonya jhumo jhumo, "Bhambo, ndi nenga?"

23 Yecho ajhakwajhanguu, "Jwachwika libumunda pamonga na nenga mu bakule ndi jhonjo jwambala kunyambila. 24 Chakaka, Mwana gwa Mundo nahwa ngita Majhandiko gha Chapanga chighalonge, nambo nalola choto mundo jhola jwapala kunnyambila Mwana gwa Mundo! Ngaibhii mbaha kwa jwenio ngabhelwike jhe!"

25 Yuda, ndi jhola jwapala kunyambila, ajhakunkonya, "Mmola, ndi nenga?"

Yecho ajhakunyanguu, "Mabhene ndi milongila."

Chakulya Bhambo

26 Pubhalila, Yecho ajhakutola libumunda, na ajhakunchenguu Chapanga ajhakumetula na kwapela bhabholwa bhake alongila, "Ntolengane nnyakile, jhenje ndi yegha jhango."

27 Peniya ajhakutola kibaba cha divaye, helahela ajhakunnomba Chapanga na kwapela alongila, "Unywengane mabhoha, 28 nhwalo jhenje ndi miyahe jhango jhilangiya kubhehe lilaghano lya Chapanga na bhando ndi chakaka, miyahe jhijhitika kwa nhwalo gwa bhando twe nabhalekekewa uhakaho.