João 9

పుట్టు గ్రుడ్డివాడు చూపు పొందుట

1 యేసు దారిలో వెళ్తూ పుట్టుకతో గ్రుడ్డివాడుగా ఉన్న ఒక వ్యక్తిని చూశారు. 2 ఆయన శిష్యులు ఆయనను, "రబ్బీ, అతడు గ్రుడ్డివాడిగా పుట్టడానికి ఎవరు పాపం చేశారు? అతడా లేదా అతని తల్లిదండ్రులా?" అని అడిగారు.

3 యేసు, "అతడు కానీ అతని తల్లిదండ్రులు కాని పాపం చేయలేదు. దేవుని కార్యాలు అతనిలో వెల్లడి కావడానికి ఇలా జరిగింది. 4 పగలున్నంత వరకు నన్ను పంపినవాని పనులను మనం చేస్తూ ఉండాలి. రాత్రి వస్తుంది అప్పుడు ఎవరూ పని చేయలేరు. 5 ఈ లోకంలో ఉన్నంత వరకు నేను ఈ లోకానికి వెలుగు" అని చెప్పారు.

6 ఆయన ఇది చెప్పి నేల మీద ఉమ్మివేసి, ఆ ఉమ్మితో కొంత బురద చేసి, అతని కళ్ల మీద దానిని పూసారు. 7 ఆయన అతనితో, "వెళ్లు, సిలోయము అనే కోనేటిలో కడుక్కో" అని చెప్పారు. సిలోయము అనగా, "పంపబడిన" అని అర్థము. అతడు వెళ్లి కడుక్కుని చూపుతో ఇంటికి వచ్చాడు.