1 యెహోవా ఉగ్రత కర్ర చేత
నేను బాధను అనుభవించిన వాన్ని.
2 ఆయన నన్ను వెళ్లగొట్టి,
వెలుగులో కాకుండా చీకటిలో నడిచేలా చేశారు.
3 నిజానికి, ఆయన రోజంతా
మాటిమాటికి నా మీద తన చేయి ఆడిస్తానే ఉన్నారు.
4 ఆయన నా చర్మాన్ని, నా మాంసాన్ని క్షీణించిపోయేలా చేసి
నా ఎముకలను విరగ్గొట్టారు.
5 ఆయన నన్ను ముట్టడించి,
విషంతో కఠినత్వంతో నన్ను చుట్టుముట్టారు.
6 ఎప్పుడో చనిపోయినవారు పడి ఉన్నట్లుగా
ఆయన నన్ను చీకటిలో పడి ఉండేలా చేశారు.
7 నేను తప్పించుకోకుండా ఆయన నా చుట్టూ గోడ కట్టించారు;
బరువైన గొలుసులతో ఆయన నన్ను బంధించారు.
8 నేను సహాయం కోసం పిలిచినా, మొరపెట్టినా
ఆయన నా ప్రార్థనకు తన చెవులు మూసుకుంటారు.
9 ఆయన రాళ్లను నా దారికి అడ్డుపెట్టారు;
ఆయన నా మార్గాలను వంకర చేశారు.