మార్కు సువార్త 4

తుఫానును శాంతింపచేసిన యేసు

35 ఆ రోజు సాయంకాలమైనప్పుడు, ఆయన తన శిష్యులతో, "మనం సరస్సు దాటి అవతలి ఒడ్డుకు వెళ్దాం" అన్నారు. 36 జనసమూహాన్ని విడిచిపెట్టి, ఉన్నపాటుననే, ఆయన పడవ ఎక్కగా వారు ఆయనను తీసుకెళ్లారు. మరికొన్ని పడవలు కూడా వారి వెంట వెళ్లాయి. 37 అప్పుడు భయంకరమైన తుఫాను రేగి, అలలు పడవ మీద ఎగసిపడ్డాయి, పడవ నీటితో నిండిపోసాగింది. 38 యేసు ఆ పడవ వెనుక భాగంలో, దిండు వేసుకుని నిద్రపోతున్నారు. శిష్యులు ఆయనను నిద్ర లేపి ఆయనతో, "బోధకుడా, మేము మునిగిపోతున్నా నీకు చింత లేదా?" అని అన్నారు.

39 ఆయన లేచి గాలిని గద్దించి, అలలతో, "నిశ్శబ్దం! కదలకుండా ఉండు!" అని చెప్పారు. అప్పుడు గాలి ఆగిపోయి అక్కడ అంతా నిశ్శబ్దమయింది.

40 ఆయన తన శిష్యులతో, "మీరు ఎందుకంతగా భయపడుతున్నారు? ఇప్పటికీ మీకు విశ్వాసం లేదా?" అన్నారు.

41 వారు చాలా భయపడి, ఒకరితో ఒకరు, "ఈయన ఎవరు? గాలి, అలలు కూడా ఈయనకు లోబడుతున్నాయి!" అని చెప్పుకొన్నారు.