8,9 పితరులకు ఇచ్చిన వాగ్దానాల విషయంలో దేవుడు సత్యవంతుడని నిరూపించడానికి, యూదేతరులు దేవుని కనికరాన్ని బట్టి ఆయనను మహిమపరచడానికి, క్రీస్తు యూదుల సేవకుడిగా మారారని నేను మీకు చెప్తున్నాను. దీని విషయమై లేఖనాల్లో ఇలా వ్రాయబడి ఉంది:
"కాబట్టి నేను నిన్ను యూదేతరుల మధ్యలో ఘనపరుస్తాను.
నీ నామాన్ని గురించి స్తుతులు పాడతాను."15:9 2 సమూ 22:50; కీర్తన 18:49
10 అలాగే మరొక చోట,
"యూదేతరులారా, ఆయన ప్రజలతో కలిసి సంతోషించండి."15:10 ద్వితీ 32:43
11 మరియొక చోట,
"యూదేతరులారా, ప్రభువును స్తుతించండి;
సర్వ జనులు ఆయనను కీర్తించుదురు గాక."15:11 కీర్తన 117:1
12 మరోచోట యెషయా ఇలా చెప్పాడు,
"యెష్షయి వేరు నుండి చిగురు వస్తుంది
అంటే జనాల మీద రాజ్యం చేసేవాడు వస్తాడు,
యూదేతరులంతా ఆయనలో నిరీక్షణ కలిగి ఉంటారు."15:12 యెషయా 11:10
13 పరిశుద్ధాత్మ శక్తిచేత మీరు అత్యధికమైన నిరీక్షణను కలిగి ఉండేలా నిరీక్షణకర్తయైన దేవుడు, మీరు ఆయనలో నమ్మకముంచిన ప్రకారం మిమ్మల్ని సంతోషంతో సమాధానంతో నింపును గాక.