1 Mamimɛ Kristo se nyɛɛli, i suɔ nyɛ, nɛ ye hɛ jaa ngɛ nyɛ he, ejakaa nyɛ ji ye bua jɔmi kɛ ye ni tsumi ɔ he se nami. Mamimɛ nɛ a suɔ, nyɛɛ da si kpɛii ngɛ Nutsɔ ɔ mi

2 Jehanɛ ɔ, i ngɛ nyɛmimɛ yihi enyɔ ɔmɛ, Evodia kɛ Sintika, pɛɛ kpae kaa a juɛmi nɛ pee kake ngɛ Nutsɔ ɔ mi, nɛ a ko pɛ hu. 3 Nɛ i ngɛ mo hu ye he piɛlɔ tutuutu ɔ dee ke, o ye kɛ bua yi nɛ ɔmɛ, ejakaa a kɛ mi tsu ni kɛ fiɛɛ Manye Munyu ɔ kɛ ha nihi. Nɛ a kɛ Klemente kɛ ye nyɛmimɛ kpa amɛ hu tsu ni, nihi nɛ a ngma a biɛ ngɛ Wami Womi ɔ mi ɔ.

4 Nyɛ bua nɛ jɔ ngɛ Nutsɔ ɔ mi be fɛɛ be. I ngɛ nyɛ dee ekohu ke, nyɛ bua nɛ jɔ. 5 Nyɛ ha nɛ a na nyɛ kaa nyɛ fo we nyɛ kɛkɛ nyɛ nɔ́ mi, nɛ nyɛ susu ɔ ni kpahi a he ngɛ nyɛ nɔ́ fɛɛ nɔ peemi mi. Nyɛ kai kaa Nutsɔ ɔ ma ngɛ be kpiti mi. 6 Nyɛ ko hao ngɛ nɔ́ ko nɔ́ ko he, se mohu nyɛɛ sɔle ngɛ nɔ́ tsuaa nɔ́ he, nɛ nyɛ de Mawu nyɛ hiami nihi. Nɛ ke e ha nyɛ heto ɔ, nyɛ hɛ ko je nɔ nɛ nyɛɛ na lɛ si ngɛ he. 7 Nɛ Mawu he jɔmi nɛ adesa ko juɛmi sui he ɔ, e maa bu nyɛ tsuihi kɛ nyɛ juɛmihi a he ngɛ Yesu Kristo mi.

8 Mamimɛ, loko ma gbe womi nɛ ɔ nya a, ma de nyɛ nɔ́ kake nɛ ɔ hu: Nyɛɛ ngɔ nyɛ juɛmi kɛ fɔ nɔ́ nɛ ji anɔkuale ɔ nɔ, nɔ́ nɛ hi kɛ nɔ́ nɛ da. Nyɛ susu níhi nɛ he tsɔ nɛ ngɛ fɛu he. Nɛ nyɛ susu níhi kulaa nɛ hia kaa nyɛ je Mawu yi ngɛ he, nɛ ma ha nyɛ bua jɔmi ɔ he. 9 Nɛ níhi kulaa nɛ nyɛ kase kɛ je ye ngɔ, kɛ níhi nɛ nyɛ na nɛ i pee ɔ, nyɛɛ hi pee; nɛ he jɔmi Mawu ɔ kɛ nyɛ maa hi si.

10 I naa Nutsɔ ɔ si, nɛ i ngɛ e yi jee kaa nyɛ ngɛ yee kɛ ngɛ mi buae ekohu. I le kaa nyɛ suɔ be tsuaa be kaa nyɛ maa mane mi nɔ́ ko, se be saii ji nɛ ɔ nɛ nyɛ na we he blɔ. 11 E tsɔɔ we kaa nɔ́ ko he ngɛ mi hiae mohu, ejakaa i kase bɔ nɛ sa nɛ ma hi si ha ngɛ bua jɔmi mi, ke i ngɛ níhi fuu aloo nɔ́ ko bɔɔ pɛ. 12 I le bɔ nɛ ma hi si ha, ke i be nɔ́ ko kulaa, aloo i ngɛ nɔ́ fɛɛ nɔ. I kase laami nɔ́ ko nɛ ngɛ si himi mi, bɔ nɛ a naa bua jɔmi ngɛ si himi fɛɛ si himi mi, ke o tɔ jio, hwɔ ngɛ mo yee jio, o na ni fuu aloo o be nɔ́ ko. 13 Enɛ ɔ he je ɔ, ma nyɛ ma pee nɔ tsuaa nɔ nɛ Mawu bi mi kaa ma pee ɔ kɛ gu Kristo, nɔ nɛ haa mi he wami ɔ e yemi kɛ buami nɔ. 14 Se kɛ ɔ, nyɛ pee bɔ nɛ sa, kaa nyɛ ye kɛ bua mi ngɛ ye haomi ɔmɛ a mi.

15 Jehanɛ ɔ, nyɛ Filipi bi, nyɛ nitsɛmɛ hu nyɛ le klɛdɛɛ kaa benɛ i je Makedonia ngɛ Manye Munyu ɔ fiɛmi sisije be ɔmɛ a mi ɔ, nyɛ pɛ ji asafo nɛ ye kɛ bua mi. 16 Nɛ benɛ i ngɛ Tesalonika tete po ɔ, ye nine su nyɛ yemi kɛ buami nɔ si enyɔ sɔuu. 17 Nɛ e ngɛ mi kaa ye bua jɔ nyɛ nike ni ɔmɛ a he mohu, se nɔ́ nɛ pee mi bua jɔmi pe kulaa ji hiɔwo nɛ nyɛ ma na ngɛ nyɛ mi mi jɔmi ɔ he ɔ.

18 Amlɔ nɛ ɔ, nɔ́ fɛɛ nɔ́ nɛ he ngɛ mi hiae ɔ, ye nine su nɔ, nɛ e be nɔ po. Nyɛ mane mi nike níhi benɛ Epafrodito ma a. A ji bɔ sami níhi nɛ jee via nɛ Mawu suɔ. 19 Nɛ Mawu ji nɔ nɛ ma ha nyɛ nyɛ hiami ni ɔmɛ kɛ je e anunyami nihi fuu nɛ e ngɛ ɔ mi, kɛ gu Kristo Yesu nɔ. 20 A ngɔ anunyami kɛ ha Mawu wa Tsɛ ɔ kɛ ya neneene. Amen.

21 Nyɛ nga Kristo se nyɛɛli kulaa nɛ ngɛ lejɛ ɔ kɛ ha mi. Nyɛmimɛ nɛ kɛ mi ngɛ hiɛ ɔ hu ke a biɔ nyɛ. 22 Nɛ Kristo se nyɛɛli kpahi nɛ ngɛ hiɛ ɔ hu ke a ngɛ nyɛ ngae, titli ɔ, ni nɛmɛ nɛ ngɛ ni tsue ngɛ Kaisare we ɔ mi ɔ. 23 Wa Nutsɔ Yesu Kristo jɔɔmi ɔ kɛ nyɛ mumi nɛ hi si.