1 Anyɛmimɛ nɛ a suɔ, nyɛ ti nihi fuu ngɛ nɛ e sɛ kaa a woɔ tsɔɔmi ni tsumi ngɔ fɔɔ a nɔ, ejakaa hwɔɔ se ɔ a maa kojo wɔ tsɔɔli ɔmɛ wawɛɛ pe ni nɛmɛ nɛ piɛ ɔmɛ. 2 Ejakaa wɔ tsuo wa peeɔ tɔmihi fuu. Ke nɔ ko ngɛ nɛ e tɔ we ngɛ e munyu tumi mi ɔ, kɛkɛ lɛɛ nɔmlɔ nɛ hi kɛ pi si ji lɛ, nɛ e ma nyɛ maa ye e nɔmlɔ tso ɔ tsuo nɔ. 3 Wa woɔ okpɔngɔ nya mi ga kɛ e se kpa bɔ nɛ pee nɛ e ya he tsuaa he nɛ wa ma kudɔ lɛ kɛ ya a. 4 Jehanɛ ɔ hu nɔ́ nyafii ko pɛ nɛ lɛ kudɔlɔ kɛ daa lɛ agbo ɔ yi kɛ yaa he fɛɛ he nɛ e ngɛ hlae, ke kɔɔhiɔ nya wa tete po.

5 Ja a nɛ wa lilɛ nɛ ngɛ wa nya mi ɔ ngɛ nyafii se e yeɔ awi agbo. Mo kai hu kaa la nyafii nyɛɔ nɛ e saa hue tso agbo. 6 Nɛ wa lilɛ ngɛ kaa la. E tsuɔ yi mi wami ni nɛ e kɛ duɔ woɔ nɔmlɔ tso ɔ he fɛɛ he. Abosiamihi a je a woɔ lilɛ ɔ he wami kɛ jee nɛ e ma nyɛ kpata wa wami tsuo hɛ mi.

7 Nɔmlɔ nyɛɔ nɛ e lɛɛ nga mi lohwehi kɛ lohwe pɛlitsɛhi kɛ zugba lohwehi kɛ wo mi lohwe slɔɔtohi nɛ a he jɔɔ kaa we mi lohwehi. 8 Se nɔmlɔ ko be nyɛe maa jɔɔ lilɛ nɛ pee klaalo nɛ e kɛ e duɔ ma tsu nɔ́ yaya a he. 9 Lilɛ kake nɛ ɔ nɔuu nɛ wa kɛ jeɔ wa hiɔwe Tsɛ ɔ yi, nɛ lɛ kɛ be komɛ ɔ, wa kɛ gbiɛɛ nimli adesahi nɛ Mawu bɔ ngɛ e subai nɔ ɔ. 10 Nya kake ɔ mi nɛ gbaami kɛ gbiɛmi tsuo jee. Anyɛmimɛ nɛ a suɔ, e sɛ kaa e baa mi ja. 11 Anɛ vu kake mi ɔ, a naa nyu mua be komɛ, nɛ be kpa komɛ hu ngo nyu lo? 12 Mangoo tso te nɔ́ nɛ woɔ ayɔ loo tso yiblii kpa ko nɛɛ? Ja a kɛ̃ nɛ ngo nyu vu be mo nyu mua nyɛɛ ma ha.

13 Nyɛ ti mɛnɔ nɛ hine ni lelɔ nɛ nuɔ nɔ sisi? Jamɛatsɛ ɔ e hi si himi kpakpa bɔ nɛ pee nɛ e ni peemi ni kpakpahi a je kpo nɛ a na. Nɛ ke ji e wo we kɛ fiɛ ɔ, lɛɛ ni lelɔ ji lɛ niinɛ. 14 Se ke hunga jemi kɛ e hi ha ami nɔ kake mumi ngɛ nyɛ tsui mi ɔ, nyɛ ko fia kaa nyɛ le ni, nɛ nimli kpakpahi ji nyɛ. 15 Ejakaa hunga jemi kɛ e hi ha ami nɔ kake pi Mawu dɛ mi nile. A ji je mi nile, nɛ pi mumi mi nile, se nile nɛ je abosiami dɛ mi. 16 Ejakaa he tsuaa he nɛ hunga kɛ e hi ha ami nɔ kake mumi ngɛ ɔ, basabasa kɛ nɔ́ yayami peemi tɛ lejɛ ɔ.

17 Se nile nɛ je hiɔwe ngɛ nyaii, pɛ be mi, e he jɔ, e nuɔ nɔ́ sisi, e naa mɔbɔ nɛ e woɔ yiblii kpakpa; juɛmi enyɔɔnyɔ be e mi nɛ e yeɔ anɔkuale. 18 Nɛ nihi nɛ ji pɛ kpatali ji nihi nɛ ma du tue mi jɔmi nami wuhi nɛ a ma kpa yiblii kpakpahi.