1,2 Paulo, Mawu sɔmɔlɔ kɛ Yesu Kristo tsɔlɔ ɔ nɛ ngma womi nɛ ɔ. A tsɔ mi nɛ ma ya wo ni nɛmɛ nɛ Mawu hla mɛ ɔ a hemi kɛ yemi he wami, konɛ ma tsɔɔ mɛ nɛ a le Mawu anɔkuale nɛ haa nɔ tsakeɔ e tsui. Enɛ ɔ ma ha nɛ a na neneene wami nɛ Mawu, nɔ nɛ yi lakpa a wo mɛ he si loko a bɔ je ɔ. 3 Nɛ ngɛ lɛ nitsɛ e be nɛ sa mi ɔ, e je Manye Munyu nɛ ɔ kpo paa kɛ tsɔɔ nɛ e ha mi he blɔ kaa ma fiɛ kɛ tsɔɔ nɔ tsuaa nɔ. Mawu, wa yi wami helɔ ɔ fami nya a, a to kikɛmɛ a ni tsumi nɛ ɔ kɛ wo ye dɛ nɛ ma tsu kɛ ha lɛ.

4 I ngma kɛ ya ha Tito nɛ ji ye bi anɔkuale mi ngɛ Nutsɔ ɔ ni tsumi ɔ mi ɔ ke: Dloomi kɛ he jɔmi nɛ je Tsɛ Mawu ɔ kɛ Kristo Yesu, wa yi wami helɔ ɔ dɛ mi ɔ ha mo.

5 I si mo ngɛ Kreta wo kpɔ ɔ nɔ konɛ o pee nɔ́ nɛ he hia kɛ wo asafo ɔmɛ he wami. Nɛ o hla nikɔtɔmahi ngɛ ma fɛɛ ma nɛ yeɔ ye kitahi nɛ i wo mo ɔmɛ a nɔ ɔ mi. 6 Bumi nɛ hi ni nɛmɛ nɛ o maa hla amɛ a he. A pee yo kaketsɛmɛ nɛ a bimɛ suɔ Nutsɔ ɔ, nɛ a tui a he munyu yaya ko kaa a ji nihi nɛ a hɛ mi jɔɛ aloo nihi nɛ bui a fɔli. 7 Piami ko nɛ ko hi nikɔtɔma nɛ ɔmɛ a he, ejakaa Mawu sɔmɔli ji mɛ. A ko pee nihi nɛ woɔ a he nɔ aloo nihi nɛ na we tsui; nɛ a ko pee da deli loo pɛli aloo nihi nɛ hɛ tsuɔ woɔ sika he. 8 A pee nihi nɛ peeɔ nɔ nubwɔ nɛ a suɔ nɔ́ nɛ hi. A hine juɛmitsɛmɛ nɛ yeɔ dami sane, nihi nɛ a he tsɔ nɛ a juɛmi ka si. 9 A hemi kɛ yemi ngɛ anɔkuale ɔ nɛ a tsɔɔ mɛ ɔ mi ɔ nɛ pi si, bɔ nɛ pee nɛ a nyɛ nɛ a tsɔɔ ni kpahi kɛ ni nɛmɛ nɛ jee munyu ɔ he nguane ɔ he nɛ a tɔmi ngɛ.

10 Ejakaa nihi babauu ngɛ nɛ a tsɔɔ atuã, titli ɔ, nihi nɛ deɔ ke Kristo se nyɛɛli kulaa nɛ ye Yuda bi ɔmɛ a mlaa amɛ a nɔ ɔ. Se enɛ ɔ ji munyu nɛ dɛ, nɛ ha we nɛ a na anɔkuale ɔ, 11 nɛ e sa kaa a kpa. Ejakaa kikɛmɛ a tsɔɔli nɛ ɔmɛ ɔ, nyɛ sika kɛkɛ nɛ a ngɛ hlae, nɛ a ha nɛ wehi fuu kpale ngɛ Mawu dloomi ɔ se. 12 Mɛ nitsɛmɛ a ti nɔ kake nɛ ji gbalɔ nɛ je Kreta a ye a he odase ke, "Kreta bi nɛ ɔmɛ tsuo yeɔ lakpa, a ngɛ kaa lohwe hejɔ peeli nɛ a muklii mi se pɛ a dii." 13 Anɔkuale munyu ji enɛ ɔ nɛ. Lɔ ɔ he je ɔ, mo kã Kristo se nyɛɛli ɔmɛ a hɛ mi wawɛɛ bɔ nɛ pee nɛ a hemi kɛ yemi ɔ mi nɛ wa. 14 Nɛ a ko bu Yuda bi ɔmɛ a nyazia amɛ tue, nɛ a ko pee níhi nɛ ni nɛmɛ nɛ kpale ngɛ anɔkuale ɔ se ɔ ngɛ hlae nɛ a pee ɔ.

15 Nɔmlɔ nɛ e tsui mi tsɔ ɔ, e naa nɔ́ fɛɛ nɔ kaa e hi nɛ e he tsɔ. Se nɔ nɛ tsui mi tsɔ we kɛ nɔ nɛ he we yi ɔ, e naa yayami ngɛ nɔ́ tsuaa nɔ mi, ejakaa e juɛmi yaya a kɛ atuã tsɔmi tsui ɔ futuu nɔ́ tsuaa nɔ nɛ e naa kɛ nɔ nɛ e nuɔ ɔ.

16 Kikɛmɛ a nimli nɛ ɔmɛ deɔ ke a le Mawu, se a ni peemi tsɔɔ kaa a li Mawu. A ji nihi nɛ puɛ, tue gboli nɛ he be se nami ngɛ ni tsumi kpakpa ko kulaa mi.