ማቶሳ 9

ዎቦ አ ፋጽቶ

1 ይንፓ ሱባ፥ የሱሳ ጎንግተ ገሊ፥ አባ ፊንግ ፋ ካታማ ቅትዳ። 2 እዘ ኤራ አሱን ፈቲ ዎቦ አ አልጋራ ቶኪ የሱሳጎ ክእዳ። የሱሳ ኡን አማንቶ ብእ፥ ዎቦ አ፥ «ታ ናአዮ፥ ዣሽትፐ! ነ ናጋርታ አቶ ጋእንትዳ» ያጋይዳ።

3 ይና ሳተ፥ አይሁደ ህገ አስታማሩንፓ ፈተ ፈተ፥ «Ꮉና ጾዝ ጫዠ ባነ» ያጋእ ፋ ዎዝንተ ቆፕዳ።

4 የሱሳ ኡን ቆፍቶ ኤሪ፥ «ኢታ ባዝ ይን ዎዝንተ አኮስ ቆፐተ? 5 የዝን፥ ‹ነ ናጋርታ አቶ ጋእንትዳ› ጋዛንፓን ‹ደንዲ ኤቂ ቅቶ› ጋዛንፓ አየ ፎለ? 6 የዝን ሳአላ አፋ ናጋራ አቶ ጋዉደስ አስ ናአስ አደትታ ዎልቃ የዛኖ ታ ይንታና ኤርሶዳ» ያጋእ፥ ዎቦ አጎ፥ «ደንዲ፥ ነ አልግዛ ቶኪ፥ ካራ ቅቶ» ያጋይዳ።

7 ዎቦ አ ደንዲ ፋ ካራ ቅትዳ። 8 ዎርዥታ ይኖ ብእ ጋማ ቆፕዳ። ይኒ ፋና አደት ዎልቃ አስስ እንግደ ጾዛ ጋላትዳ።

ማቶሳ ጼግንተ

9 የሱሳ የይጋፓ ደንዲ Ꮉንግተራ ማቶሳ ጋዘ ቃራጠ ጋችዘ በሳ በቲ የዝን ብእ፥ «ታና ካሎ» ያጋይዳ።

ኤዝን ደንዲ ካልዳ።

10 የሱሳ ማቶሳ ካራ ለማተላ በቲ የዝን፥ ቃራጠ ጋችዘ ጋማ አሱንን ናጋራንቹን ይእ ኤራን ኤ ታማሩንራ ዎላ ሞኦደስ በትዳ። 11 ፈቲ ፈቲ ፋርሳዉን ይኖ ብእ፥ የሱሳ ታማሩንራ፥ «ይን አስታማርዘ ቃራጠ ጋችዙንራን ናጋራንቹንራ አኮስ መኤ?» ያጋይዳ።✝9:11 ሉቃ. 15:1-2

12 የሱሳ ይኖ ስእ፥ «ጋላ ኮሽዘ Ꮉርግንትዙንስ ፋትን ፋጹንስ ባያ። 13 የዝን ይን Ꮉንግ፥ ‹ታኒ ይን ዣርሽቶ ባይዝን ይን መሉንና ማሮደ ፋና ኮያነ› ጋእንት ጻፍንትዳና ዋግዛኮ ኤሮተ። አኮስ ጋይኮ፥ ታኒ ናጋራንቹንና ጼጎደስ ይእዳፕ አትን ጽሉንና ጼጎደስ ይእካያ» ያጋይዳ።✝9:13 ማቶ. 12:7፤ ሆሴ. 6:6

የሱሳ ጾማ ባዝ ኦጭንትዳ

14 የ ዎደ ዋሐንሳ ታማሩን የሱሳጎ ሺቅን፥ «ኑንን ፋርሳዉንን ጾማነ፥ የዝን ነ ታማሩን አኮስ ጾሞሶ?» ያጋእ ኦጭዳ።

15 የሱሳ ማህ ኡንታጎ፥ «ሙሹራ ኡንታራ የዝን ጼግንት ይእደ አሱን አዛኖደስ ዳንዳአነ? ሙሹራ ኡን ካለፓ ኤክንቶደ ዎደ ዮኦዳ፥ ኡን የ ዎደ ጾሞዳ።

16 «ክሌ ማኦፓ ፌ ጋልአ ማኦላ ስክዘ ኦደን ባያ። ይኒ ፋና የይዝኮ ክልዘ ጋልእዛ ፌነ። ፌዽታን ዎዚ ዳልጋነ። 17 ክሌ ዎይነ ጋልአ ስልጰ ጉጅዘ ኦደን ባያ። ይኒ ፋና የይዝኮ ክሌ ዎይንዘ ጋልአ ስልጵዛ ሳነ ዎይንዘን ላንታነ፤ ስልጵዘን ላምእን ማዶሰ ባዝ ማቃነ። የዝን ክለ ዎይነ ክሌ ስልጰ ጉጆደስ ቤዛነ። ይኒ ፋና የይዝኮ ላምኡንን ኢትካይዛራ ናግንታነ» ያጋይዳ።

Ꮉይቂደ ናእቶን የሱሳ ማእቶ ቦችደ ማችቶ

18 የሱሳ ይና ኦህትላ አፋ የዝን፥ አይሁደ Ꮉላቁንፓ ፈታይ ኤጎ ይእ፥ ኤ ቲኖ ቡንቁንቲ፥ «ታ ናእታ Ꮉተ Ꮉይቂዳ፥ የዝን እዛ ፋጾደ ፋና ነ ይእ ነ ኩሽቶ ኢላ አፋ ጋዶዮ» ጋእ ዎስዳ። 19 የሱሳ ደንዲ ኤራ Ꮉንግዳ፤ ኤ ታማሩንን ካልዳ።

20 ኤ Ꮉንግዝን ታጶ ላምእ በረ ኩሙ ሱ ጎጊ ዋይዘ ፈቲ ማችታ ሱባራ ሺቂ የሱሳ ማእት ማጫርቶ ቦችዳ። 21 እዛ ፋ ዎዝንተ፥ «ታ ኤ ማእት ማጫርቶ ጻላላ ቦችዛኮ ፋጾዳ» ያጋእ ቆፕዳ።

22 የሱሳ ሱብ ማቂ እዞ ብእ፥ «ታ ናእተ፥ ዣሽትፐ! ነና ነ አማንታ ፋዳ» ያጋይዳ። አስታን ኢራ ፋጺ አትዳ።

23 የሱሳ አይሁደ Ꮉላቅዘ ካራ የልደ ዎደ ዛየ ፉግዙንናን ዬክዙንና ብእ፥ 24 «አነ Ꮉልኦተ፤ ኤራ ናእታ ገንትዳፕ አትን Ꮉይቂካያ» ያጋይዳ። የዝን አሱን ኤላ አፋ ሚጭዳ። 25 አሱንና ባለ ከስዳንፓ ሱባ ኬ ገሊ፥ ናእት ኩሽቶ አይክዳ፥ ናእታን ደንዲ ኤቅዳ። 26 ይና ኦህታ ይና ሳእቶ ኡባ የልዳ።

የሱሳ ላምእ ቆቁንና ፋዳ

27 የሱሳ የይጋፓ ደንዲ ጎደ ቲኖ Ꮉንጎደራ ላምእ ቆቁን ፋ ቃልቶ ቅ ዪዚ፥ «ዳዉተ ናአዮ፥ ኑና ማሮያ» ያጋይትራ ኤዛ ካልዳ።

28 የሱሳ ኬ ገልዘ ዎደ ቆቁን ኤዛ ካሊ የልዳ። የሱሳ ኡንታጎ፥ «ታኒ ይኖ ኦቾደስ ዳንዳእዛኖ ይን አማናነተ?» ያጋይዳ።

ኡንትን፥ «ዬ፥ ላ» ያጋእ ማህዳ።

29 ይንፓ ሱባ፥ የሱሳ ኡን ኣፍቶ ቦቺ ኡንታጎ፥ «ይንትስ፥ ይን አማንቲ ፋና Ꮉኖ» ያጋይዳ። 30 ኡን አፍታን ቡጉንትዳ። የሱሳ ኡንታጎ፥ «Ꮉኖ ኦደስን ኦህፐተ» ያጋእ ምን ኦህዳ። 31 የዝን አሱን Ꮉንግ የሱሳ ባዝ ይና ሳእተ ኡባ ኦህዳ።

32 ኡን የይጋፓ ከዘ ዎደ አሱን ቱና አያና አይኪ ሙሙዝደ ፈቲ አስ የሱሳጎ ክእዳ። 33 ቱና አያና ኬዝደፓ ሱባ ሙመ አ ኦህንትዳ። አሱንን ጋማ ቆፕዳ፥ «ይኒ ፋና ክለ ባዝ እስራኤለ ሳአ Ꮉንካያ» ያጋይዳ።

34 የዝን ፋርሳዉን፥ «ቱና አያኑን Ꮉላቃራ ቱና አያኑንና ከሳነ» ያጋይዳ።✝9:34 ማቶ. 10:25፤ 12:24፤ ማር. 3:22፤ ሉቃ. 11:15

የሱሳ አሱንስ ይቅስንትዳ

35 የሱሳ አይሁደ ዎሳ ኬ ታማርስተራ፥ ሳሎ ካእቱሞ ዎንገለ ሳባክተራ፥ አሱንና Ꮉርገ ኡባፓ ፋተራ ካታማን ካራ ጋንጨ ኡባነ ዉትዳ። 36 ጋማ ዎርዥታ፥ የንግዘ አስ ባይዘ ዱሮ ፋና ኡንታና በእዘ አስ ብን ኡን የዛኖ ብእ ኡንትስ ይቅስንትዳ። 37 ፋ ታማሩንጎ፥ «ሺቆደ ካታ ጋማ፥ የዝን ካቶ ሺሽዘ አሱን ኤራ። 38 ይኒ ግሾ፥ ላ ካ ሺሾደ ኦቻንቹንና ዳኮደ ፋና ዎሶተ» ያጋይዳ።