Mateus 26

Yesuusa wodhodes zorinttida

1 Yesuusa yinna timirttito ubba hyaaside wode fa tamaaruntsago, 2 «Lam77i qammappa suuba, Faasika ba7ale bonchchize qamma maaqqizanno yin erane. Yinna qammite As Na7ay masqalalla afa suxunttodes as kushe aadhii inggnttoda» yagayda.

3 Ye wode kahinunts hyalaquntsin cimuntsi, Qayyaafa gaaze kahinunts hyalaqize keetstsa shiiqii,✝26:3 Keze 12:1 4 asi erikaayzin Yesuusa aykkii, wodhodes zorinttida. 5 Yezin un, «Asuntsi gidda kachchi denddaame fana ga7i, Faasika bonchchize qamma maaqqippe» yagayda.

Fettii maachita Yesuusa shitto tizhida

6 Yesuusa Bitaaniya katama qursuma hyarggide Simoona kara yene. 7 Yesuusa leematella yezin fettii maachita albasxiroose bilqqaaxe kumutsi gaama al77o shitto ekkii yi7i Yesuusa ommite gussida. 8 Yezin Yesuusa tamaaruntsi yinno bi7i zhilidhdhi, «Hyanna shittita hyarii iitizanna akkoso?✝26:8 Luqa. 7:37 9 Hyanna shittita al77o waagas bayzinttii, birtta dahuntsis ingginttodes dandda7inttane» yagayda.

10 Yesuusa un gaazanno erii, unttago, «Hyanna maachito akkos waytsete? Iza taas lo77o baz oochchida. 11 Dahuntsi ubba wode yinttara yessada. Yezin taanii yinttara ubba wode yezoos. 12 Iza hyanna shittito taalla afa gussidanna tana moogodes giigisades.✝26:12 Mahe 15:11 13 Taanii yinttis turo ohine; sa7a ubba hyay Wonggelize sabbakinttize bessa aban, asuntsi izo ohode gaar iza oochchidanna ohinttoda» yagayda.

Yihuda Yesuusa aatsii inggodes giiginttida

14 Ye wode taphpho lam77i Yesuusa tamaaruntsappa fetay, Yesqorootu sa7a Yihuda ga7inttize kahinunts hyalaquntsago, 15 hyanggi, «Taanii yinttis Yesuusa aatsii inggiko, yin taas akko inggode?» yaga7i unttana oocida.✝26:15 Zakka. 11:12 Un zorintti hyasttam shuchchi bira santime*26:15 Bira santtime: Akkon laaminttikaayze geeshi bira ga7e.*26:15 Hyasttam bira santtime: Hyasttam bira santtime Isra7eele sa7a aro wongginttizen bayzinttize waaga. inggida. 16 Yinnippa suuba, Yihuda Yesuusa aatsii inggodes wottize wode koyane.

Yesuusa Faasika kawuto fa hawaaruntsara muyda

17 Boora ba7ale bonchchize tiino qamma, Yesuusa tamaaruntsi eego yi7i, «Faasika bonchchize qamma ne ma7ade katstsa nu aba giigisade?» yagayda.

18 Yesuusa unttago, «katama yeze atstsego hyanggi, ‹Asttamaarize, taas wode yellide gisho ta tamaaruntsara Faasika bonchchize qamma ne kara aatstsoda gayda› yaga7ote» gayda.

19 E tamaaruntsi Yesuusa fana kiittidanni fana oochchii, Faasika ba7ale qamma ma7ade katstsa giigizida.

20 Sa7ita ugurize wode Yesuusa taphpho lam77i hawaaruntsara katstsa ma7ades bettida. 21 Un muuzin, Yesuusa unttago, «Taanii yinttis turo ohine; yinttappa fettii atstse tana aatsii inggoda» yagayda.

22 Un gaama tannii, fete fete, «Laatstso, turo tana yessane?» ga7i eza oocida.

23 Yesuusa mahi, «Fa kushito taara wolla gabate dakkizay E tana aatsii inggoda. 24 As na7a, Xoozze qaaltte ees xaafinttidanni gaar hyayqqoda. Yezin As na7a aatsii inggize atstsa bade; ye atstse yelinttikaayzara attezako ees lo77o yeshsha» yagayda.✝26:24 Maz. 41:9

25 Eza aatsii inggodes yeze Yihuda mahi, «Asttamaarzayo, ne gaaze tanane?» yagayda.

Yesuusa mahi, «Ne gayde fana» yagayda.

Laatstse kawo

26 Un muuzin, Yesuusa daabbo boora ekkii Xooz galatida. Ye booriza baxxi fa tamaaruntsis inggi, «Hya7ate, mo7ote, hyanna ta ashito» yagayda.

27 Ushiton ekkii, Xooz galatida. Unttis inggi, «Ubbuntsi hyannippa uzhote. 28 Hyanna gaama asunts nagartta atto ga7inttode fana lanttize ta suutsito. Hyanna suutsita Xoozii yinttara gelize kille caaqito.