João 13

Yesu kankuwagulula magulu Wantumini wakuwi

1 Iweriti lishaka lya pamberi pa msambu gwa Pasaka. Yesu kavimaniti handa saa yakuwi isoka ya kuwuka pasipanu na kugenda kwa Tati. Shipindi shoseri yomberi kawafiriti nentu wantu wa pasipanu yawaweriti wakuwi, na kawafiriti mpaka lupeleru!

2 Yesu pamuhera na wantumini wakuwi waweriti walivaga kuliya shiboga sha pamihi. Shetani kingiriti kala mumoyu mwa Yuda, mwana gwa Simoni Isikariyoti, maholu ga kumgalambuka Yesu. 3 Yesu kavimaniti handa Tati kaweriti kamupa makakala, kavimaniti kuwera kalawa kwa Mlungu na kaweriti kankugenda kwa Mlungu. 4 Su, kawukiti pameza, kayikusa nguwu yakuwi, katola shitambala na kulitawa mushyunu mwakuwi. 5 Shakapanu katula mashi mubakuli, kanja kuwagulula magulu wafundwa wakuwi kugapukuta kwa shitambala shilii shakashitawiti mushinu mwakuwi. 6 Pakiziti kwa Simoni Peteru, nayomberi katakula, "Mtuwa, hashi gwenga gwiza kugagulula magulu ganeni?"

7 Yesu kamwankula, "Gwenga hapeni gwerewi vinu shantenda ashi, kumbiti hagwelewi shakapanu."

8 Peteru kamgambira, "Gwenga hapeni gungululi magulu gangu nakamu!" Yesu kamwankula,

"Pangulula ndiri magulu gaku, hapeni guweri ntumintumi gwangu kayi."

9 Simoni Peteru kamwankula, "Mtuwa, nagungululi magulu hera! Gugagululi mawoku gangu na mtuwi viraa."

10 Yesu kamgambira, "Yawakoga kala wawera waherepa na wafiruwa ndiri kunawa ira magulu gawu. Mwenga muherepa, kumbiti mwawoseri ndiri." 11 Yesu kamumaniti kala ulii yakagenda kumgalambuka, ndo mana kalongiti, "Mwenga muherepa, kumbiti yumu kaherepa ndiri."

12 Pakamaliriti kuwagulula magulu gawu, kavulumula nguwu yakuwi, na kalivagiti pahala pakuwi pakwegera na meza, su yomberi kawakosiya, "Hashi, mwerewa shanuwatenderani mwenga?" 13 "Mwenga munshema mfunda na Mtuwa, mwenga mtakula weri toziya ndo neni. 14 Paiwera neni Mtuwa gwenu na mfunda gwenu, nuwanaviya magulu mwenga, mwenga viraa mfiruwa kulinawiviyana magulu. 15 Nukupanani kala mfanu, su mwenga mtendi viraa ntambu yanuwatenderani. 16 Nuwagambirani nakaka, wantumintumi wakulu ndiri kuliku mtuwa gwawu na ntumintumi hapeni kaweri mkulu kuliku ulii yakantumiti. 17 Vinu muumana unakaka awu, hamuweri na sekuseku pamgatenda.