1 धाड़न वालो, पौलुस! जोन ला परमेस्वर को मरजी लक यीसु मसीह को पेरीत कह्यो जावत होतो, अना आमरो भाऊ सेस्थिनेस,✝ 2 कुरिन्थुस नगर को परमेस्वर को वोना कलीसिया को नाव, जोन यीसु मसीह मा पवितर कियो गयो सेत। अना जोनला परमेस्वर ना पवितर लोक बनन को लाय उनको संग निवाड़ो सेत। जोन हर जघा पिरभू यीसु को नाव ला हाकल सेत। 3 आमरो बाबूजी परमेस्वर अना पिरभू यीसु मसीह को कन लक तुम्हिला दया अना सान्ती भेटत रव्हे।✝

4 जोन किरपा तुम्हिला परमेस्वर ना यीसु मसीह लक दियो सेत। वोको लाय मी आपरो परमेस्वर ला धनवाद देवा सेऊ। 5 यीसु मसीह मा होयके तुमी हरेक गोस्टी मा, मजे सप्पा बचन अना सप्पा गियान मा, धनी बन गयो सेत। 6 अना यीसु मसीह को यो सन्देसा तुमरो मा पक्को भयी गयो सेत। 7 यहान तकन का, कोनी बरदान को तुमरो मा कमी नाहती, अना तुमी आमरो पिरभू यीसु मसीह को, परगट होवन को रस्ता चोवत रव्हासो। 8 परमेस्वर तुमला अखट्ट तकन पक्को बनाय राखेत, जोन लक तुमी आमरो पिरभू यीसु मसीह को दिवस तकन बेडाग रव्हो। 9 परमेस्वर मा भरोसा ठेवनो पाहिजे। जोन ना आपरो टूरा यीसु मसीह को संग रव्हन को लाय हाकलयो सेत।

10 मोरो संगीहुन! आमरो पिरभु यीसु मसीह को नाव मा मोरो तुमरो लक पिराथना सेत का तुमरो मा कोनी फूट नोको होवे। तुम सबा एक संग जुटो रव्हो अना तुमरो बिचार अना धेय एकच होवे। 11 काहेकि अगो भाऊहुन! खलोए को घराना को लोकगीन, तुमरो बारेमा सांगयो सेत का तुमरो मा झगड़ा रार होवा सेत। 12 मोरो सांगनो यो से का, तुमरो मा कोनी तो आपरो आपला "पौलुस को", कोनी "अपुल्लोस को", कोनी "कैफा को", अना कोनी "मसीह को" कव्हासेत। 13 का मसीह बट गयो सेत? का पौलुस तुमरो लाय कूरूस मा चघायो गयो सेत? या तुमिला पौलुस को नाव लक बप्तिस्मा भेटयो सेत। 14 मी परमेस्वर को धनवाद करासू का क्रिस्पुस अना गयुस ला सोड़, मीना कोनी ला बप्तिस्मा नही देईसेव। 15 कहि असो ना होहे का, कोनी बोलहेत का तुमीला मोरो नाव लक बप्तिस्मा मिलिसेत। 16 अना हव मीना स्तिफनास को घराना ला छोड़, अखीन कोनी ला मी बप्तिस्मा नही देइसेव। 17 काहेका मसीह ना मोला बप्तिस्मा देवन काजी नही, पर साजरो बारता आयकुआय लाय हक लक धाड़िसेस। वो भी सबद को लक नही, कही असो ना होहे की, मसिहा को कूरूस ला लोक बेकार समझन लगहेत।

18 काहेका कूरूस को कथा, नास होवन वारा लाय, अठ्ठियापन सेत। पर आमी सूटकारा पावनवालो को लाय, परमेस्वर को ताकत सेत। 19 काहेका लिखीसेत,

"मी गियानी गिनको गियान ला नास कर देहू,

अना समजदार गीनको समजदारी ला बेकार कर देहू।"

20 कहान रहयो गियानीगिन? अना कहान रहयो मोसे को नियम को गुरू? कहान रहयो यो दुनिया को बकवासी? का परमेस्वर ना दुनिया को गियान ला, अठ्ठियागिरी नही ठहराईसेस? 21 काहेका जबा परमेस्वर को गियान को लक दुनिया, परमेस्वर ला नही जानिन, तबा परमेस्वर ला यो साजरा लगयो का परचार को "मुरखता" को लक, भरोसा करनवारा ला सूटकारा दे। 22 यहूदी गीन हिदान माँगसेत, अना यूनानी गीन गियान चाव्हा सेत। 23 पर आमी कूरूस मा चघायो, गयो मसीह को च परचार करीसेजन। यो यहूदिगीन काजी भरोसा, मा बाधा, सेत। अना गैर यहुदी लाय जाल सेत। 24 पर परमेस्वर को निवाड़ो गयो लोक गीनको लाई, चाहे वय यहूदी होय, या गैर यहुदी, येच मसीह की ताकत अना परमेस्वर की गियान से। 25 काहेका परमेस्वर को बेअक्कल, मानूसगिन को पूरो अक्ल लक लगत सेत, अना परमेस्वर की कमजोरी, मानूस की ताकत लक, लगत ताकतवर से। 26 ओ मोरो संगीहुन! अबा जरासो सोचो का जबा परमेस्वर ना तुम्हिला हाकलो होतो, ता तुमरो लक लगतसो ना अक्कल वर होतिन ना ताकतवर, लगत लोकगिन को समाज भी नीचो होतो। 27 गियानी गिनला लजान काजी, परमेस्वर न तुम लोकगीन ला बेचयो से, जोन दुनिया को डोरा मा मुरख से। ताकतवर गीनला लजान काजी, वोना लोकगीन ला निवड़ीसेस, जोन दुनियाँ को डोरा मा कमजोर से। 28 मोठो मानुसगिन को घमंड तोडन काजी, परमेस्वर वय लोकगीन ला निवाड़ी सेस, जोन दुनिया को नजर मा अठ्ठिया सेत। 29 जोनमा कोनी देह वालो मानूस, परमेस्वर को पुढ़ा घमंड नोको करे। 30 पर वोच परमेस्वर को कन लक तुमी यीसु मसीह मा सेव, जोन परमेस्वर को कन लक आमरो लाय गियान ठैरी सेत। नेकी अखीन पवीतर, अना मुकती। 31 एकोलाय जसो पवीतर गिरंथ मा लिखीसेत "अदी कोनी घमंड करनो चव्हा सेत तो उ पिरभू मा घमंड करे।"