1 मि बुजुरुग कन लक, ओनो बेचयो हुयो बायकाहुन ला अना ओको लेकरा ला जोन लक मि खराई लक माया राखासेउ; अना ना केवल मि, बलकि वय सब च भी जोन सत ला जानासेति, 2 मनजे ओनो खराई लक जोन आमी मा बनयो रव्हसे, अना सबच बेरा आमरो सँगा रव्ह।
3 मोठयो दआजी परमेस्वर को कन लक ओको किरपा, दया अना सान्ती, हमेसा आमरो संगा रहेत अना मोठयो दआजी को टूरा यीसु मसीह कन लक खराई अना माया मा आमरो हाल बनयो रहेत।
मत अना चितोनी
4 तुमरो टूरा-टुरीहुन लाओना खरो को कनलक जिंदगी जीता चोयके जेनको हुकूम आमला मोठयो दआजी लक मिलयो से, मि लगत खुस हुयो सेऊ। 5 अता हे बायका, मि तोला कोनी नयो हुकूम नही तर ओनोच हुकूम ला लिख रव्हयो सेऊ, जोन ला आमिना सुरु को बेरा लक मिलीसे आमला आपसी मा माया करनो चाहिसे। 6 माया यो मायना से की आमी ओको हुकूम पर चलबिन। यो वाच हुकूम से। जोन ला तुमना सुरुवात लक आयकिया सेव, जोन पर तुमला माया को जसो चलनो चाव्हसे।
7 संसार मा लगत सा भटकानवारा सेति। असा मानूस जोन यो नही मानासेत का ऐना धरती पर मानूस को रूप मा यीसु मसीह आयो से, याच ता छली सेत अना मसीह को बैरी सेत। 8 स्वता ला चेताय लेव। ताकि तुमी ओला घुमाय नोको बसेव जेनको लाई आमिना कड़ो मेहनत करीसेजन, पर तुमला ता तुमरो पुरो प्रति फर पावनो से।
9 जोन कोनी लगत दुर भटक जावासे अना मसीह को बारे मा दियो गयो खरो सिक्सा मा टिकयो नही रव्हा, उ परमेस्वर ला नही पाय सका अना जोन ओको सिक्सा मा बनयो रव्हसे, मोठयो दआजी अना टूरा दुही च ओको जवर सेत। 10 अदी कोनी तुमरो कठा आयके यो सिक्सा ला नही देसे, ता ना ओला आपरो घर मा ओको आवभगत करने अना नाच ओको पहुचन पर नमस्कार करने; 11 काहेकि जोन असो मानूस ला मान करासे, उ ओको खोटो काम मा हिस्सादार होवासे।
12 मोला लगत सा गोस्टी तुमला लिखनी से, पर कागद अना स्याही लक लिखना नही चाव्सेजन; पर मोला आस से की मि तुमरो कठा आयके आमना-सामना गोस्टी करुहू, जेकोलक की तुमरो खुसी पूरी होय जाय।
13 तोरी बहिन को टूरा-टुरीहुन को तोला नमस्कार मिलेहेत।