Atos 3

लगंडा भिखमंगा ला साजरो करनो

1 एक दिवस पतरस अना योहन दुफारी, तीन बजे पिराथना को बेरा मंदिर जाय रहयो होतो। 2 लोक जनम को लगंडा ला हररोज आवन-जावन को जघा मा बसाय देत होतीन ताकि उ मंदिर मा आवन जावन वालो लक भीख मांगे। 3 यो मानूस न जबा योहन अना पतरस ला मंदिर मा धसता देखिस, ता ओना उन लक आपरो लाय भीख मांगिस। 4 उनना सिधो योहन कन चोविन अना पतरस ना कहीस, "हमरो कन देख।" 5 तबा उ काही पावनो की इक्सा लक उनको, कन ताकन लग्यो। 6 पर पतरस न वोको लक चोवत हुयो कहीस "मोरो जवर तोला देवन लाय काही पैसा नाहती पर जोन काही सेत उ मी तोला देवासू। नासरत को यीसु मसीह को नाव लक उभो होय अना चल मंग।" 7 मग वोना वोको उजो हात ला धरके ना ओला उचलीस, एकदम ओको पाय अना घुटना मा जान आय गयी। 8 तबच उ उछल के उभो भय गयो अना इतानी-उतानी उछलत कुदत उनको संग परमेस्वर को मंदिर मा गयो। 9 सप्पा लोक गीन ने वोला चलता-फिरता अना परमेस्वर की स्तूती करता देखीन। 10 लोकगिन ना वोला चीन लेइन यो ता ओच आय जोन मंदिर को सुन्दर फटका मा भीक मांगत होतो वोको सग घटयो घटना ला चोयके वय एकाएक अचंभा मा पड़के चकीत भय गईन।

मँदिर मा पतरस को संदेस

11 उ मानूस पतरस अना योहन को संग होतो एकोलाय सबरी लोक अचम्भीत होयके, सुलेमान नाव को डहरी को जवर परात आइन। 12 पतरस न जब असो चोयो ता लोकगीन लक कह्यो, "अगो इसरायल को लोकगिन, तुम ऐको पर कायलाय अचम्भीत सेव, अना असो घुर-घुर के आमीला कायलाई चोय रही सेव, असो लगासे का आमीना अपरो ताकत अना भक्ति को हिम्मत लक यो मानूस ला चलन-फिरन को लायक बनाय दियोसेजन। 13 अबराहम इसहाक अना याकूब को परमेस्वर, आमरो आजा पुरखा परमेस्वर न आपरो दास यीसु ला अपरो महिमा देइसेस पर तुमीना वोला अधिकारी गीन ला सोप दियो अना तुमीना पेन्तुस-पीलातुस को पुढा नकार दियो जबकि पिलातुस न वोला छोड़ देनो को मनसा राखीयो होतीस। 14 तुमीना वोना साजरो अना नेक मानूस ला ठुकरायो, अना वोको बदला मा पीलातुस लक मांग करयत का एक खून करनवालो ला तुमरो लाय छोड़ दियो जाय।✝3:14मत्ती 27:15-23; मरकुस 15:6-14; लूका 23:13-23; योहन 19:12-15 15 तुमीना जिंदगानी को रास्ता चोवन वारा ला मार डाकयात। पर परमेस्वर न वोला मरयो हुयो मा लक जित्तो करीस। हमी वोको पुरुप सेजन। 16 काहेकी अमी यीसु को नाव मा भरोसा करासेजन। एकोलाय यो वोकोच नाव सेत जोन न यो लगंडा मानूस ला ताकत देइसेस, जोन ला तुमी चोवासेव अना वोला जानासेव वोला पाय मा ताकत देयि सेस जेनला तुमी चोय रही सेव। ओनाच बिस्वास लक जोन यीसु लक भेटासे, तुमी सब को पुढ़ा एने मानूस ला पुरो तरीका लक साजरो करीसेस। "

17 "अना अबा अगा भाऊ गीन मी जानासू का यो काम तुमी ना वसोच करीसेव अना वोसोच, तुमरो मुखियागीन ना भी करीसेत। 18 पर जेना गोस्टी ला परमेस्वर न सबच मोठो भविस्यवक्ता को टोन्ड लक पहेलच सांग दियो होतो का वोको, मसीह दुख उठाये वोना ऐना रिती लक पूरो करीसेस। 19 एकोलाय परमेस्वर को कन लौट जाव जोन लक उ तुमरो पाप हुन ला छिमा करेत। 20 जोन लक आतमा को ताकत को बेरा पिरभू को कन लक आय अना पिरभु तुमरो लाय मसीहा ला धाड़े जोन न ओना पयले लक बेचके राखीसेस, मजे यीसु ला। 21 अना मसीह ला जरूरी से का वोना बेरा तकन सरग मा रहेत, जबा तकन सबरी गोस्टी पहेलो जसो सुधारी न जाय। जोन को चरचा लगत पहेल लक परमेस्वर न अपरी पवीतर लोकगीन लक करी होतीस। 22 जसो का मोसे भविस्यवक्ता न कहीस, मोरो जसो एक भविस्यवक्ता तुमरो लोकगीन मा लक धाडे़ह अना जोन काही उ तुमला करन लाई कहे वोला तुमी पुरो रिती लक मानना। 23 पर जोन कोनी मानूस वोना भविस्यवक्ता की गोस्टी नही मानेत वोला परमेस्वर को लोकगीन लक बेगरो कियो जाहे, अना वोको सत्यानास कर दियो जाहे। 24 हा समूएल अना वोको मंघा आयो सबच भविस्यवक्ता गीन ऐना दिवस गीन को बारे मा मुनादी कियो होतो। 25 तुमी तो वोना भविस्यवक्ता गीन अना वोना करार को वारिस सेव जोन ला परमेस्वर न तुमरो आजा पुरखा, लक करार करीसेस जबा वोना अबराहम लक कहीहो तीस, तोरो खानदान लक धरती का सप्पा खानदान आसीस पाहेत। 26 अना परमेस्वर न अपरो दास ला बेचीस, अना तुमरो जवर धाड़िस, ताकि तुमला तुमरो खोटो रास्ता लक हटाय के आसीस देहे।"