Filipenses 4

1 एकोलाई अगा मोरो चहेतो भाऊ तुमी जोन मोरो आँनद अना मुकुट सेव, तुमला चोवन ला मोरो जीव तरससे, हे चहेतोगीन, पिरभु मा ऐना रिति पक्को रव्हो।

बरताव की सिक्सा

2 मि यूओदिया अना सन्तुखे दुही ला बिनती करासेऊ की वय पिरभु मा एक मन एक बिचार रव्हे। 3 अगा मोरो खरो संग करमी, मि तोला लक भी बिनती करासेऊ की तु ऐना आई माईगीन को सहायता करजोस जिन्होसीन मोरो संग अना क्लेमेन्स अना मोरो अखिन संग करमी सकट जिनको नाव जीवन को किताब मा लिखयो से, साजरो बारता को साठी मेहनत करीसेस।

4 पिरभु मा हमेसा खुसी मनाव, मि मंग कव्हसू की खुसी मनाव।

5 तुमरो कोमलता सब भला मानूस पर दिसायी जाहे। पिरभु जवर सेस। 6 कोनी भी गोस्टी को चिंता नोको करहो, पर हरेक गोस्टी मा पिराथना अना निवेदन लक तुमरो बिनती, धनवाद को संग परमेस्वर को पुढा पेस कियो जाहे। 7 तबा परमेस्वर को सान्ती, जो समझ लक हटके से, तुमरो हिरदय अना तुमरो बिचारहुन ला मसीह यीसु मा संभालके राखे।

8 एकोलाई हे भाऊगीन जोन-जोन गोस्टी खरो सेत, अना सुहानो मान भाव को सेत अना जोन-जोन नियाव वारो सेत, जोन-जोन गोस्टी पवीतर सेत, जोन-जोन गोस्टी मन ला खुस करासेत अना साजरो अना बड़ाई वालो सेत उन ला मन लगाय राखो। 9 जोन काही तुमना मोरो लक सीखयासेव अना अपनायो सेव, आयकिया अना चोयासेव, उनको मंघा चलोह अना परमेस्वर जो सान्ती को सोता से, तुमरो संगा रह।

दान को लाई धनवाद

10 मि पिरभु मा लगत धनवाद देवसेऊ का एतरो दिवस को मंघा मोरो लाई तुमरो चिन्ता मंग लक जाग गयी से। एमा बगर संका को पयलेच तुमला मोरो चिन्ता होतो पर यो बिचार ला सांगन लाई मौका नही मिलयो। 11 मि आपरो कोनी कमी को लाई यो नही कव्हसू, काहेका मीना हरेक हाल मा संतोस रव्हनो सीक लेईसेउ। 12 मि हिनो दसा अना भरयो पुरयो दसा मा रव्हनो जानासेऊ, हरेक गोस्टी अना हरेक हाल मा मीना संतोस होवनो भुखो रव्हनो अना घटनो बढनो सीक लेईसेऊ 13 जो मोला ताकत देवासे ओको लक मि सबच काही कर सकासेउ।

14 मंगच तुमना भलो करयासेव का मोरो दुख मा संगी रहयात। 15 अगो फिलिप्पिन हुन, जसो का तुमी खुदच जानासेव, साजरो बारता को पिरचार को काम मा जबा मि मकीदुनिया लक सार भयो ता तुमला छोड़ कोनी अखिन कलीसिया लेवन देन को बारे मा मोरो संगा सामिल नही भयी। 16 ऐना रिती लक थिस्सलुनीके नगर मा भी तुमना मोरो सहायता को लाई एकच गन नहि, पर कई गन धन धाड़यात। 17 यो गोस्टी नोहोय की मि धन चाव्हसेउ, पर असो फर चाव्हसेउ जोन तुमरो लाभ को लाई बड़तो जाये। 18 मोरो जवर सब काही से अना लगत से। तुमना इपफ्रुदीतुस को हात लक जोन दान धाड़ीसेव वोला पायके मि संतोस सेऊ। उ ता मन ला खुस कर देवन वालो खुसबु अना अपनायो जावन वालो बलिदान से, जोको लक परमेस्वर खुस होवासे। 19 मोरो परमेस्वर भी आपरो ओना धन लक जो महिमा सकट मसीह यीसु मा से तुमरो हरेक जरुरत ला पूरी करेत। 20 आमरो परमेस्वर अना बाबूजी को महिमा जुग-जुग तकन होवत रव्हे। आमेन।

आखरी नमस्कार

21 हरेक पवीतर मानूस ला जोन मसीह यीसु मा से, मोरो नमस्कार। जोन मोरो संगी भाऊ से, तुमला नमस्कार कव्हसेजन। 22 सब पवीतर लोकगीन को, खास रीतीलक कैसर को घराना को, तुमला नमस्कार! 23 पिरभु यीसु मसीह को किरपा तुमरो आतमा को संग रव्हे।