Romanos 4

अबराहम को उदाहरन

1 का अमी कहबिन, अबराहम को जोन आमरो जाति को अजी सेत? वोको अनुभव काजक सेत?*4:1मजे "अबा अमी अबराहम को बारेमा काजक कव्हबीन?जोन तन को हिसाब लक आमरो पूरखा से वोला काजक भेटयो?" 2 यदि अबराहम वोको नेक काम को कारन, नेक गिनयो जातो। तो काही गरब को गोस्टी होतो। तरी परमेस्वर को नजर मा वोको काम, काही महात्व को नाहोति? 3 गिरंथ कव्हसेत, "अबराहम ना परमेस्वर मा बिस्वास करीस, , अना वोको बिस्वास को कारन परमेस्वर ना वोला सही मानयो।" 4 काम करन वालो मानूस ला बनी दियो जावा सेत। तरी वा भेट नाहोती। वोला काही असोच भेटयो होतो। 5 तर यदि कोनी मानूस काम करन को बजाय वोना परमेस्वर मा बिस्वास करा सेत, जोन पापी ला भी सोड़ देवा सेत। ता वोको बिस्वास च वोको नेक होवन को कारन बन जावा सेत। 6 राजा दाऊद, असो मानूस ला धन्य कव्हसेत। जोनला परमेस्वर बिना काम करे नेक माना सेत।

7 "धन्य से उ जोन को पाप छिमा भयो सेत,

अना उनको खोटो करम ढाकयो गयो सेत!

8 धन्य से उ मानूस,

जोन को पाप को लेखा-जोखा परमेस्वर नहि राखासे।"

9 क असो धन्य बचन खतना कियो यहूदी काजी सेत, या गैरयहुदी काजी सेत? आयको आमी का सांगि सेजन, "अबराहम ना परमेस्वर मा बिस्वास करीस, अना यो वोको लाय नेकी गीनो गयो।" 10 वोला कसो नेक मानूस गीनो गयो? का वोना बेरा लक, वोला आपरो खानदान ला खतना कराके बेगरो करन को बिधान भेटयो होतो। का नहि? वोना बेरा लक असो बिधान नही आयो होतो। उ तबा बिना खतना को होतो। 11 बाद मा वोको खतना कियो गयो, अना वोको खतना यो दिसान को एक निसान होतो। का वोको बिस्वास को कारन परमेस्वर ना वोको खतना लक पयले नेक इन्सान मान लियो होतो। अना एकोलाय अबराहम उन सबको दआजी सेत। जोन परमेस्वर मा भरोसा राखा सेत। अना वोको लका नेक मानूस को रूप मा स्वीकार कियो जावा सेत। चाहे उनको खतना नहीं हुयो होय।✝4:11 पैदाइस 17:10-11 12 अबराहम खतना करन वालो को भी दआजी से। मजे, खतना करवान वालो को अलावा, बिस्वास को वोच जिंदगी ला भी जीवा सेत। जोन खतना करन लक पयले आमरो दआजी अबराहम ना जीयो होतो।

बिस्वास लक सूटकारा

13 जबा परमेस्वर ना अबराहम अना वोको खानदान लका वादा कियो होतो, का दुनिया लक वोको सम्बंध होयेत। ता वोना असो एकोलाय नही करयो, का अबराहम ना कानून को पालन कियो होतो। बल्कि एकोलाय का उ मानत होतो, अना परमेस्वर लक नेकी को रुपमा स्वीकार कियो गयो होतो। 14 काहेका परमेस्वर जोन वादा करा सेत। वोला कानून को पालन करन वालो ला दियो जावा सेत, ता बिस्वास को काजक मतलब सेत? अना परमेस्वर को वादा बेकार सेत। 15 कानून परमेस्वर को गुस्सा ला कम करा सेत। तरी जितानी कानून नोहोति, उतानी हुकूम तोड़न को सवाल च नाहती।✝4:15 रोमियो 3:20; 5:13; 7:8,10

16 अना एकोलाय यो वादा बिस्वास को अधार मा होतो। जोनलक वादा ला सबा अबराहम को खानदान लाय, पक्को परमेस्वर को कन लक भेट दियो जाय। नाच केवल कानून ला मानन वाला लोकगिन लाय, बल्कि उन लोक गिनको लाय भी जोन अबराहम ला माना सेत। काहेका अबराहम सबा बिस्वासी गिनको दआजी आय। 17 जसो का गीरंथ कव्हासेत, "मीना तोला लगत देस को दआजी बनायो सेत। वोना परमेस्वर को नजरमा अबराहम आमरो दआजी से।" जोनको असो बिस्वास होतो का, परमेस्वर मरयो हुया ला जिंदगी देवा सेत। अना जोन नाहती वा भी बन जावा सेत।✝4:17 पैदाइस 17:5; यसायाह 48:13 18 सबा मानूस को आस को बिरोध मा आपरो आस ला मनमा सपना मा चोय के अबराहम ना बिस्वास करयो, एकोलाय उ कह्यो हुया गोस्टी को कारन लगत देस को दआजी बनयो। जसो लिखयो होतो, "तोरो खानदान लगत होयेत।" 19 अबराहम करीब सम्बर साल को होतो। तरी वोको बिस्वास कमजोर नाहोति। जबा वोना आपरो देह को बारेमा बिचार करयो, जोन पयले लक कोनी काम को ना होतो, अना सारा भि लेकरा जलम देवन को काबिल नाहोती। 20 वोको बिस्वास ला वा नहीं सोड़यो, अना उ वादा मा सक नही करयो, वोको बिस्वास मा ताकत होतो, अना वा जोस लक भर गयो अना परमेस्वर को स्तुति करयो। 21 अना वोला पक्को भरोसा होतो का परमेस्वर आपरो परन ला जरूर पूरो करयेत। 22 "यो बिस्वास को कारन उ नेक मानूस कहलायो" 23 मोसे को नियम को यो बचन न केवल अबराहम लक, 24 बल्कि आमरो लक भी सम्बन्ध राखासे। यदि आमी परमेस्वर पर भरोसा राखा सेजन। पिरभू यीसु ला मरयो हुयो मा लक जित्तो करिसेत, तो हमी असोच भरोसा को कारन नेक मानूस मानो जाबिन। 25 वोच यीसु आमारो पाप को कारन धरयो गयो, अना हमला पाप छिमा कर नेक मानूस ठयरावन काजी जित्तो भयो।