1 अब आमी बिस्वास को लक परमेस्वर को नजरमा नेक मानूस सेजन, ता अमी आमरो पिरभु यीसु मसीह लक परमेस्वर संग मिलाप कर लेयबीन।✝ 2 उ अमिला परमेस्वर को किरपा मा बिस्वास को लका आनयो सेत जोनमा अमी अबा सेजन। अना अमिला असो आस सेत का परमेस्वर को महीमा मा आमरो हिस्सादारी सेत।

3 इतरोच नहि आमी दुख अना तकलिफ मा भी, घमंड करबीन। काहेका आमी जाना सेजन का, दुख तकलिफ लक धिरज, पैदा होवा सेत। 4 धीरज परमेस्वर को मंजूरी अना सेत। अना वोको मन्जूरी उम्मीद पैदा करतत। 5 अना आस अमिला निरास नहीं होन देवा सेत। काहेका पवितर आतमा कन लका जोन अमिला दियो गयो सेत। परमेस्वर को पिरेम आमरो हिरदय मा, उबड़ायो गयो सेत।

6 जबा अमी अता बेसहारा होतिन। तबच सही बेरा मा पापीगिन लाय मसीह ना आपरो बली दियो। 7 कोनि नेक इंसान को लाय मरनो कोनी मुस्किल काम सेत का? हव असो भी होय सका सेत कोनी असो करन को हिम्मत कर सका सेत। 8 परा परमेस्वर ना अमिला दिसायो का उ आमरो लक कितरो माया करा सेत। जबा अमी अबा पापी होतिन। तब च मसीह आमरो लाय मरयो। 9 यदि आमी मसिहा को खून को कारन धरमी ठहरायो गयो, तो आमी पक्को मसिहा मा परमेस्वर को गुस्सा लक बच जाबीन। 10 आमी परमेस्वर को बैरी होतिन, पर जबा परमेस्वर को संग आमरो मेल, वोको टूरा को मरन लक भई गयो। तब परमेस्वर को सगं मेल हो जान को कारन लक, वोको टूरा को जीवन लक पक्को आमरो सूटकारा हो जाहेति। 11 इतरोच नही, अबा तो आमरो पिरभू यीसु मसीह कन लक परमेस्वर ले आमरो मेल भई गयो। एकोलाय आमी वोको लक परमेस्वर पर भरोसा राखके घमंड करासेजन।

12 यो गोस्टी बिचार करन जोग से। का एकच मानूस लक जग मा पाप आयो, अना पाप लक मौत, असो परकार सबा मानूस मा यो मौत फैल गई। काय से की सबच पापि सेत। 13 मोसे को नियम को पुढ़अ जग मा पाप होति, पर नियम नही होवन को कारन पाप को लेखा नही लियो जात होतो। 14 मंग आदम ले मोसे लक मरनो, उन लोकगीन पर राज करत होति। जोन ना आदम को जसो कोनी हुकूम ला नही तोड़ी होति मजे पाप नही कियो होतो। आदम उ मानूस को रूप से, जोन आवन वालो होतो। 15 मंघ आदम को गलती, अना परमेस्वर को बरदान ला, कोनी बरोबरी नही से, यो सच्चो से की, एकच मानूस को गलती को कारन लक सबच लोक मरीन पर यो फर लक कदी जादा महान सेत। परमेस्वर को दया, अना वो दया लक भरो वरदान, जो एकच मानूस यीसु मसीह लक, सबला छिमा भेटयो से। 16 एक मानूस को गलती अना परमेस्वर को बरदान को बरोबरी नाहती। एक को गलति को कारन लक दन्ड को हुकूम दियो गयो। पर गजब गलती को मघा बरदान दियो गयो, जोन लक पाप लक छिमा मिल गयो। 17 यो सचसे का मरन को राज, एक मानूस को गलति को कारन, एक च लक सुरु भई। पर एको फर लक कहि लगत जोन लोकगीन ला परमेस्वर को किरपा अना धरमिपन को बरदान ज्यादा लक ज्यादा मिलहेत। वय एकच मानूस यीसु मसीह को लक पाप को छिमा भेटत। 18 एकोलाय जसो एक गलति, सब मानूसगिन को लाय दन्ड को, हुकूम को कारन भयो। वसोच एक नेकी को काम भी, सब मानूस को लाय जीवन को कारन ठैयरेत। 19 काहेका जसो एक मानूस को हुकूम नही मानन को कारन गजब लोकगीन पापी ठहरिन, वसोच एक मानूस को हुकूम माननो लक, गजब लोकगीन नेक ठहरायो गइन। 20 कानून ला खोटो तरीका लक बढान को लाय पेस कियो गयो होतो। परा जबा पाप बढयो तबा परमेस्वर को किरपा भी लगत बढ़ गयो। 21 एकोलाय जसो पाप मौत को कारन सासन करा सेत। वसोच परमेस्वर की किरपा को भी नियम, अमीला यीसु मसीह को कारन अमर जीवन को कन लेजावा सेत।