Lucas 18

Djesu ebelusi yidunge o musyengi wu Djeriku

35 Djesu anobe bebeli na Seriku, vamabe yidunge yitsane va mughulu nzile yimabe muvondi. 36 Yidunge yeni anowulu nduku yinombu yi batu bamavyoghaange, amabawivule rye: «Yine yi? Dyambu yi?» 37 Batu bakemuwaghule rye: «Djesu mwise Nasarete evyoyi.» 38 Na djandi amaghamughe: «Djesu, mwane Davide, ndabi wandi yingebe!» 39 Batu abamavyoghaange va wusu andi, bakemughubisaange: Aa vole! Tumbe yidunge yeni akebwébwelaange ughamughe na mangolu: «Mwane Davide, ndabi wandi yingebe.» 40 Djesu, anosikeme, amarume rye: «Mumbeyilyanu.» Yidunge anobambene, Djesu akemuwivule rye: 41 «Yi wirondi ngawuvayile?» Djandi akemuwaghule rye: «Fumu, nyirondi ubwélabe nane va teghe.» 42 Djesu akemutsingule rye: «Tsyélabi! Yitu yaghu yimaghughobule.» 43 Sundila, misu ma yidunge make tyemune, na akeduke Djesu noyeneyitsange Nzambi. Batu botsu na bédilabi, djowandi bakeyitse Nzambi.