Матай 8

Көптеген аурулар мен жын қинағандардың сауығуы әрі римдік жүзбасының зор сенімі

1 Иса таудан түскеннен кейін Оның соңынан көптеген халық ерді. 2 Сонда алапеспен ауырған*8:2 Алапес секілді тері ауруларымен науқастанғандар таза емес (арам) деп есептеліп, басқа адамдардан аластатылатын (Леу 13:1-46). біреу Исаның алдына келді де, тізе бүгіп тағзым етіп:

— Мырза, егер қаласаңыз, мені құлантаза сауықтыра аласыз, — деп өтінді. 3 Иса қолын созып, денесіне тигізді де:

— Қалаймын, құлантаза сауығып кет! — деді. Сол сәтте-ақ ауру адам алапесінен арылып, тазарды.

4 Иса оған:

— Байқа, бұл туралы ешкімге тіс жарушы болма! Бірақ діни қызметкерге барып, қарал. Содан кейін Мұса Тауратта бұйырған құрбандықты ұсын.*8:4 Леу 14:2-32. Бұл жұртқа сенің сауыққаныңның дәлелі болады, — деді.

5 Иса Қапарнаум қаласына кіргенде, бір римдік жүзбасы алдына келіп:

6 — Мырза, қызметшім үйде сал болып қатты қиналып жатыр, — деген өтініш жасады.

7 — Жарайды, барып сауықтырайын, — деп жауап берді Иса.

8 Ал римдік жүзбасы:

— Мырза, мен Сіздің шаңырағымның астына келуіңізге лайық емеспін.*8:8 Осылай бұл римдік жүзбасы өзінің шетелдік әрі күнәкар екендігін мойындады. Алайда Құдай әрбір ұлттың адамдарына рақым көрсетуге дайын (Елш 10:1-6,34-36; Еф 2:11-19). Тек бір сөз айтсаңыз болды, қызметшім сауығып кетеді. 9 Мұны білемін, себебі мен де біреудің қол астындамын, өзіме бағынышты жасақшыларым да бар. Біреуіне: «Бар!» десем, барады, басқасына: «Кел!» десем, келеді, қызметшіме: «Мынаны істе!» дегенімде, ол соны орындайды, — деді.

10 Мұны естіген Иса қайран қалып, соңынан еріп келе жатқан халыққа қарап: — Шын айтамын, Маған осындай сенім артқан кісі Исраил халқынан ешқашан кездескен емес!

11 Сендерге шындығын айтайын: шығыс пен батыстан келген көптеген жат жұрттық адамдар Ыбырайым, Ысқақ және Жақыппен бірге Құдай Патшалығында дастарқан басына жайғасатын болады. 12 Ал Патшалыққа алдымен тағайындалғандар сыртқа, қара түнекке қуылмақ! Сонда олар зар еңіреп жылап, қинала тістенетін болады,*8:12 Немесе: Алайда «Патшалықтың ұлдары» (яғни исраилдіктер) теріс жолдарынан қайтпағандары үшін тозаққа түспек! Сонда олар жылап, бармақтарын тістейтін болады (13:42; Лұқ 13:28). — деді. 13 Содан кейін Иса жүзбасына:

— Үйіңе қайт, сеніміңе сай тілегің болсын! — деді.

Сол мезгілде-ақ оның қызметшісі ауруынан сауығып кетті.

14 Иса Петірдің үйіне келгенде, оның қайын енесінің безгекпен ауырып,*8:14 Яки: енесінің қызуы көтеріліп. (Көл жағасындағы батпақты жерлерде безгек ауруы кең жайылған еді.) төсек тартып жатқанын көрді. 15 Иса оның қолына алақанын тигізгенде, қызуы басылып сауығып кетті. Әйел орнынан тұрып, оларды күтіп қызмет ете бастады.

16 Күн батқанда жұрт жын соққан талайларды Исаға алып келді. Ол айтқан бұйрығымен*8:16 Яки: айтқан сөзімен (8:8). жындарды қуып шығып, барлық науқастарды сауықтырып жіберді. 17 Осылай Ишая пайғамбардың: Ол «біздің қасіретімізді Өзіне алды, біздің ауруларымызды өз мойнымен көтерді»*8:17 Иш 53:4. деп алдын ала айтқаны жүзеге асты.

Мәсіхтің жолымен жүруге белді бекем буу

18 Иса айналасына халықтың көптеп жиналғанын көріп, шәкірттеріне: «Көлдің арғы бетіне*8:18 Яғни көлдің оңтүстік-шығыс жағына (8:28; Лұқ 8:26). өтейік», — деді.

19 Бір дін мұғалімі қасына келіп:

— Ұстаз, қайда барсаңыз да, мен Сізге еремін,*8:19 Яки: жолыңызды қуып шәкіртіңіз болайын (4:19-22; Мар 10:28-30). — деді. 20 Иса оған:

— Түлкінің іні бар, құстың ұясы бар, ал көктен келген Билеушінің*8:20 Яки: Құдай тағайындаған Билеушінің. Немесе: «Адам Ұлының» (Дан 7:13-14; Түсіндірмені де қараңыз). бас тірейтін тұрағы да жоқ,*8:20 Мар 1:45. — деп жауап берді.

21 Шәкірттерінің өзге біреуі:

— Мырза, алдымен үйге барып, әкем қайтыс болғанша қасында болып, сүйегін жерлеп келейін. Рұқсат етіңізші, — деп сұрады. 22 Иса оған:

— Маған шәкірт болып ер! Өлгендерін жерлеуді (рухани) өлілерге қалдыр!*8:22 Яки: сондай жұмыстармен айналысуды Құдайдың рухани өмірі (яғни Онымен шынайы қатынасы) жоқ адамдарға қалдыр! (Мәсіхтің шәкірттері халыққа шынайы өмір туралы Ізгі хабарды уағыздауға міндетті еді: Лұқ 6:20-21; 9:60; Жох 3:16,36; Қор1 7:29-35.) — деп тапсырды.

Исаның сұрапыл дауылды және жындарды бағындыруы

23 Содан кейін Иса қайыққа мініп алды. Шәкірттері Оған ілесіп, бәрі жағадан аттанды. 24 Кенеттен сұрапыл дауыл көтеріліп, қайық толқынның астында қалды. Иса бұл кезде ұйықтап жатты. 25 Шәкірттері Исаға жақындап, Оны оятып:

— Мырза, құтқара көріңіз! Құритын болдық! — деп айқайлады. 26 Иса оларға:

— Сенімі аздарым-ай, неліктен соншама қорқасыңдар? — деді де, орнынан тұрып, жел мен көлге тыйым салды. Сонда жым-жырт тыныштық орнады. 27 Аң-таң болған қайықтағылар өзара: «Тіпті жел мен көл де бағынатын Бұл кім Өзі?» — десті.

28 Иса шәкірттерімен бірге көлдің арғы бетіндегі Ғадара*8:28 Немесе: Гергеса. (Ғадара және Гергеса деп те аталған Гераса Ғалилея көлінің оңтүстік-шығыс жағында орналасқан қалалар еді.) өңіріне жеткенде, жын соққан екі кісі Оған кездесе кетті. Қабірге арналған үңгірлер арасынан шыға келген олар құтырынған, аса қауіпті болатын. Сондықтан ешкім сол жолмен жүре алмайтын. 29 Кенеттен олар: «Құдайдың рухани Ұлы, бізде нең бар? Уақытынан бұрын бізді азаптауға келдің бе?» — деп айқай салды.

30 Алысырақта үлкен бір топ шошқа жайылып жүрген болатын. 31 Жындар: «Егер бізді қумақ болсаң, ана шошқаларға жібере гөр», — деп өтінді. 32 «Кетіңдер!» — деді Ол. Жындар сол екі кісіден шығып, әлгі хайуандарға енді. Кенеттен олардың бәрі тік жардан көлге қарғып, суға батып, қырылып қалды.

33 Бақташылары қашып кетіп, қалаға барып, бастарынан өткен оқиғаны әрі жын соққан екі кісімен не болғанын жұртқа түгелдей айтып берді. 34 Сонда бүкіл қала халқы Исамен кездесу үшін шықты. Оны көргенде: «Біздің жерімізден кетіңіз», — деп өтінді.*8:34 Жар 26:16; Әйүп 21:14-15; Лұқ 5:8,37.