1 Ani khanđiri ani Antiohija inele akala proroci hem učitelja: o Varnava, o Simeon vičime Niger, o Lukija tari Kirina, o Manain, kova barilo e vladareja e Irodeja, hem o Savle.

2 I sar jekhvar slavinena ine e Gospode hem postinena, o Sveto Duho phenđa: "Ciden maje akana e Varnava hem e Savle zaki buti ki savi me vičinđum len."

3 Tegani on, palo postiba hem moliba, čhivde pumare vasta upro lende hem bičhalde len ko drom.