Atos 3

O sasljariba e manušesoro kova našti te phirel

1 Jekhvar sar o Petar hem o Jovan džana ine ko Hram ki molitva, ko trin o sati, 2 nesave manuša akharena ine e manuše kova našti ine te phirel pana taro bijandipe. Svako dive čhivena le ine uzali kapija e Hramesiri savi vičini pe Šuži, te prosini okolendar kola đerdinena ko Hram. 3 Kad dikhlja e Petre hem e Jovane sar mangena te đerdinen ko Hram, rodinđa lendar pare.

4 A o Petar, zajedno e Jovaneja, šukar dikhlja ano leste hem phenđa lese: "Dikh amen!"

5 Hem ov dikhlja ano lende, adžićerindoj da ka den le nešto.

6 A o Petar phenđa lese: "Nane man ni srebro, ni zlato, ali dava tut okova so isi man: ano anav e Isusesoro e Hristesoro taro Nazaret, ušti hem phir!"

7 I dolinđa e manuše oto desno vas hem vazdinđa le. I otojekhvar lesere pre hem o ćanga ule zorjarde, 8 i ov ripinđa ko pre hem lelja te phirel. Tegani olencar đerdinđa ko Hram, phirindoj, ripindoj hem hvalindoj e Devle. 9 Kad sa o manuša dikhle le sar phirela hem sar hvalini e Devle, 10 pendžarde le dai ov okova kova bešela ine hem prosini angli e Hramesiri kapija vičimi Šuži. Adalese inele but začudime hem zadivime zako okova so ulo oleja.