4 O Pilat palem iklilo avri, hem phenđa e narodose: "Ače, ikalava le avri angla tumende, ali te džanen da na arakhljum nisavi krivica upro leste."

5 Tegani o Isus iklilo avri, e krunaja oto kare ko šero hem ano lolo ogrtači, a o Pilat phenđa: "Dikhen e manuše!"

6 Kad o šerutne sveštenici hem o stražarija dikhle le, vičinde: "Čhiv le ko krsto! Čhiv le ko krsto!" A o Pilat phenđa lenđe: "Len le tumen, i čhiven le ko krsto, adalese so me na arakhljum nisavi krivica upro leste."