12 I sar đerdini ine ko nesavo gav, nakoro leste ale deš gubavci kola terdine po dur olestar 13 hem vičinde: "Isuse, Gospodarona, smilujin tut amenđe!"

14 Kad dikhlja len o Isus, phenđa lenđe: "Džan hem mothoven tumen e sveštenikonenđe!"

I sar džana ine dromeja, saslile tari guba.

15 I jekh olendar kad dikhlja so saslilo, irinđa pe koro Isus slavindoj e Devle oto sa o glaso. 16 Pelo anglo lesere pre mujeja đi phuv, zahvalindoj lese. A ov inele Samarijanco.

17 Tegani o Isus pučlja: "Na li deš saslile? A kaj pana okola enja? 18 Nijekh li olendar na aračhilo te irini pe hem te slavini e Devle, sem akava jekh kova čak nane ni Jevrejco?"

19 I phenđa e manušese: "Ušti hem dža! Ti vera spasinđa tut!"