I čorori udovica dela sa so isi la
1 Na nakhlo but palo adava, o Isus vazdinđa plo šero hem dikhlja sar o barvale manuša čhivena pumare pare ani e hramesiri kutija zako čediba. 2 Ađahar dikhlja hem jekha čorora udovica sar čhivela samo duj najtikore kovanice. 3 Tegani phenđa: "Čače vaćerava tumenđe, akaja čorori udovica čhivđa više sarijendar. 4 Adalese so sare akala dinde oto buderi so isi len, a oj, kojai čorori, dinđa sa so inola zako živiba."
O Hram ka ovel peravdo hem o znakija oto bare nevolje
(Mt 24,1–14; Mk 13,1–13)