Luka 7

O Isus vazdela taro mule e udovicakere čhave

11 Na but palo adava, o Isus dželo ki diz savi vičini pe Nain. Oleja džele lesere učenici hem but narodo. 12 A kad alo paše uzalo udar e dizjakoro, reslja e dizutnen sar legarena e mule čhave, kova inele jekhoro pe dajaće koja inele udovica. But dizutne džana ine e dajaja te parunen e čhave.

13 I kad dikhlja la o Gospod, pelo lese žal olaće hem phenđa laće: "Ma rov!"

14 I alo paše hem dolinđa pe upro nosilja, i tegani okola so akharde terdine.

A o Isus phenđa: "Terneja, tuće vaćerava, ušti!"

15 I o mulo beštino hem lelja te vaćeri, i o Isus dinđa le lesere dajaće.

16 Tegani sare darandile hem slavinde e Devle vaćerindoj: "Baro proroko iklilo maškar amende!" hem: "O Devel alo te pomožini ple narodose!"

17 I adava šundilo ki sa i phuv e jevrejengiri hem ko sa o pašutne thana.