18 Ače sar inele kad bijandilo o Isus o Hrist: Lesiri daj i Marija inele mangli e Josifese. Ali angleder so te len pe, dodžanđa da ačhili khamni oto Sveto Duho. 19 Lakoro rom o Josif inele pravedno manuš, i adalese so na manglja te lađari la anglo manuša, tajno manglja te ačhaj la.
20 I sar razmislini ine adalestar, zasuća. Ano suno alo lese o anđeo e Gospodesoro hem phenđa lese: "Josife, čhaveja e Davidesereja, ma dara te le e Marija romnjaće! Adalese so o Sveto Duho ćerđa la te akhari adale čhavore ano vođi. 21 Oj ka bijani čhave hem tu ka de le anav Isus1,21 anav Isus značini: "O Gospod spasini." adalese so ka spasini ple narodo lengere grehendar."
22 Sa adava ulo sar te pherđol okova so o Gospod vaćerđa palo proroko:
23 "Šunen! I čhaj ka ačhol khamni!
Ka bijani murše hem ka vičinen le Emanuel"
(so značini: "O Devel amencar").
24 Kad o Josif uštino oto sojba, ćerđa sar so phenđa lese o anđeo e Gospodesoro – lelja e Marija romnjaće. 25 Na suća olaja sar romnjaja đikote na bijanđa e čhave. A tegani ov dinđa le anav Isus.