Mateus 13

3 I but so vaćerđa lenđe ano priče, sar akaja:

"Šunen! Iklilo o sejači te sejini. 4 I sar frdela ine o seme, nesave zrnja pele ko drom, i o čiriklja ale hem sa hale len. 5 A nesave pele ko than kote inele hari phuv upro bara, i odmah lelje te ikljon, adalese so na inele ani hor phuv. 6 Ali kad iklilo o zoralo kham, thabile hem šućile, adalese so na ine len baro koreno. 7 A nesave pele maškaro kare, i o kare barile hem tasavde len. 8 A nesave pele ki šukar phuv hem ande bijandipe – šel puti, šovardeš puti ili trijanda puti više adalestar so inele sejime. 9 Kas isi kana, nek šunel!"