13 Kad o Isus alo ko krajo e Filipesere Cezarejakoro, pučlja ple učenikonen: "So phenena o manuša, ko injum me, o Čhavo e manušesoro?"
16 O Simon o Petar phenđa: "Tu injan o Hrist, o Čhavo e dživde Devlesoro!"
O Isus vaćeri ple meribnastar
21 Otegani o Isus lelja te mothoj e učenikonenđe so valjani te džal ko Jerusalim hem but te patini e starešinendar, e šerutne sveštenikonendar hem e učiteljendar e Zakonestar, hem te ovel mudardo hem o trito dive te uštel taro mule.
22 I o Petar cidinđa le ki strana hem lelja te ukorini le vaćerindoj: "Te na del o Devel, Gospode! Nikad naka ovel tuće adava!"
23 A o Isus irinđa pe nakoro leste hem phenđa lese: "Dža mandar, Sotone! Terđoveja maje ko drom, adalese so na razmislineja devlikane, nego manušikane."
Sar te ovel pe e Isusesoro učeniko
(Mk 8,31–9,1; Lk 9,22–27)
24 Tegani o Isus phenđa ple učenikonenđe: "Ko mangela te džal pala mande, mora te ačhaj pe ple dživdipnastar hem te lel plo krsto hem te phirel pala mande.
28 Čače vaćerava tumenđe, isi nesave akate maškara tumende kola naka meren đikote na dikhena e Čhave e manušesere sar avela ple carstvoja."